काठमाडौँ । दसैँ तिहारका लागि सार्वजनिक सवारीसाधनको अग्रिम टिकट बुकिङ कहिलेदेखि खुला गर्ने भन्ने विषय अझै अन्योल छ । यातायात व्यवस्था विभागका महानिर्देशक (डिजी)को सरुवाका कारण अग्रिम टिकट बुकिङको निर्णयमा ढिलाइ भएको हो ।
भौतिक पूर्वाधार तथा यातायात मन्त्रालय र नेपाल यातायात व्यवसायी राष्ट्रिय महासङ्घबिच शनिवार भएको बैठकले यातायात व्यवस्था विभागसँग छलफल गरी शीघ्र अग्रिम टिकट खुला गर्ने निर्णय गरेको थियो । तर, विभागका महानिर्देशक उद्धवप्रसाद रिजालको सरुवा भएको र नयाँ महानिर्देशकले जिम्मेवारी सम्हाली नसकेकोले टिकट बुकिङको निर्णय हुन नसकेको हो ।
यातायात व्यवस्था विभागका अनुसार नयाँ महानिर्देशक आएपछि एक दुई दिनमै टिकट बुकिङको निर्णय हुनेछ । दसैँको अग्रिम टिकट बुकिङ खुल्ने टुङ्गो लाग्न नसक्दा दसैँमा घर जाने तयारीमा रहेकाहरू निराश छन् । रोजगारी वा अध्ययनका लागि राजधानी सहितका प्रमुख सहरहरूमा बस्ने मानिसहरू दसैँ मनाउन आफ्नो परिवार भएका ठाउँमा जाने प्रचलन छ । जसका कारण दसैँको समयमा यातायातमा मानिसको भीड हुन्छ र टिकट नपाउने समस्या हुन्छ ।
