दीपेन्द्र प्रजापति/कालो झोला ।
बीरगंज, ०६ माघ । उज्यालो नेपाल पार्टीले पर्सा निर्वाचन क्षेत्र नं. २ बाट प्रतिनिधि सभा सदस्यका लागि युवा उम्मेदवार सीए कृष्ण मुरारी प्रजापतिलाई औपचारिक रूपमा टिकट प्रदान गरेको छ । वीरगञ्ज महानगरपालिका वडा नं. २६ निवासी प्रजापतिलाई पार्टीले आगामी प्रतिनिधि सभा निर्वाचनका लागि उम्मेदवार चयन गरेको हो ।
उक्त टिकट वितरण कार्यक्रम उज्यालो नेपाल पार्टी पर्सा जिल्ला अध्यक्ष रामबाबु प्रसाद यादव तथा केन्द्रीय सदस्य रणधिर कुमार वर्णवालको रोहबरमा सम्पन्न भएको थियो ।
कार्यक्रममा पार्टी नेतृत्वले युवाको सक्रिय सहभागिता, व्यावसायिक योग्यता र इमानदार राजनीतिलाई अघि बढाउने उद्देश्यका साथ सीए प्रजापतिलाई उम्मेदवार बनाइएको स्पष्ट पारेको छ । पार्टीका नेताहरूले पर्सा क्षेत्र नं. २ मा विकास, सुशासन र जनमुखी राजनीति आवश्यक रहेको बताउँदै युवा उम्मेदवार मार्फत नयाँ सोच र ऊर्जा जनतामाझ लैजाने विश्वास व्यक्त गरेका छन् ।
टिकट प्राप्त गरेपछि सीए कृष्ण मुरारी प्रजापतिले उज्यालो नेपाल पार्टीको नीति, सिद्धान्त र जनअपेक्षालाई केन्द्रमा राखेर निर्वाचनमा सक्रिय रूपमा सहभागी हुने प्रतिबद्धता व्यक्त गरेका छन् । उज्यालो नेपाल पार्टीले यस निर्णयलाई युवामैत्री र परिवर्तनमुखी राजनीतितर्फको महत्वपूर्ण कदमका रूपमा लिएको छ ।
