नेकपा एमालेमा फागुन २१ को प्रतिनिधिसभा निर्वाचनको प्रत्यक्षतर्फ उम्मेदवारको टिकट वितरणमा चरम असन्तुष्टि देखिएको छ ।
पार्टीको ११औं महाधिवेशनमा अध्यक्ष केपी शर्मा ओलीविरुद्ध प्रतिष्पर्धा गरेका समुहलाई टिकट वितरणमा किनारा गरिएपछि अहिले एमाले भित्रको असन्तुष्टि छताछुल्ल भएको हो ।
शनिबार बसेको सचिवालय बैठकले १६५ सिट मध्ये धेरै सिटमा टिकटको टुंगो लगायो तर अध्यक्ष ओलीले आफुविरुद्ध प्यानलनै बनाएर प्रतिष्पर्धा गरेका लगभग सबै नेताहरुको टिकट ‘होल्ड’ गरे । तर अब होल्ड गरिएका क्षेत्रमा टिकट वितरण लगभग भएको छ र धेरैजसोलाई टिकटबाट बन्चित गरिएको छ । अध्यक्षमा प्रतिष्पर्धा गरेका ईश्वर पोखरेलको काठमाडौँ-५ को टिकट अझै होल्ड छ र यसको निर्णय गर्ने अधिकार ओलीले आफैसँग राखेका छन् ।
त्यस्तै उपमहासचिव योगेश भट्टराईले त टिकट नै पाएनन् । ताप्लेजुङबाट योगेशको स्थानमा युवा संघका अध्यक्ष क्षितिज थेवेलाई टिकट दिएको छ । भट्टराईले टिकट वितरणप्रति असन्तुष्टि जनाउदै केन्द्रीय कार्यालयमा आफ्नो फरक मत समेत दर्ता गराएका छन् ।
त्यस्तै महाधिवेशनमा महासचिवमा प्रतिष्पर्धा गरेका सुरेन्द्र पाण्डेलाई त जिल्लाबाट सिफारिस समेत गरिएको थिएन । त्यसैगरी अर्का प्रखर नेता पूर्व मन्त्री गोकुल बास्कोटाको टिकट पनि खोसिएको छ । उनी गत निर्वाचनमा काभ्रे-२ बाट विजयी भएका थिए । काभ्रे-२ मा ओलीले अशोक ब्याञ्जुलाई टिकट दिएका छन् ।
त्यस्तै अग्नि खरेल, ठाकुर गैरे, कृष्णगोपाल श्रेष्ठ, कर्ण थापा, पुरुषोत्तम पौडेल, इन्द्रलाल सापकोटा विन्दा पाण्डे, रचना खड्काले पनि टिकट पाउन सकेनन् ।
त्यस्तै दैलेखमा पार्टीको आन्तरिक निर्वाचनमा सबभन्दा धेरै मत पाएर सिफारिस भएका केन्द्रीय सदस्य विष्णु रिजालले पनि टिकट पाउन सकेनन् । संस्थापनकै नेता मानिने रिजाल सामाजिक सञ्जाल र मिडियामा ओलीको पक्षमा मुखरित हुने नेतामै पर्छन् तर पनि उनलाई टिकट दिइएको छैन ।
महाधिवेशनमा ओलीको विपक्षी प्यानलबाट प्रतिष्पर्धा गरेका उपाध्यक्षमा विजयी भएका गोकर्ण विष्ट गुल्मी–२ बाट उम्मेदवार बनेका छन् भने सचिवमा प्रतिस्पर्धा गरेका विनोद ढकाल मोरङ–६ बाट उम्मेदवार बनेका छन् । यी बाहेक ईश्वर पोखरेल पक्षका अन्य नेताले टिकट पाएका छैनन् ।
