बंगलादेशले अर्को महिना हुने टी-२० विश्वकपमा भारतमा खेल्न अस्वीकार गरेपछि उसको स्थानमा अब स्कटल्याण्डले प्रतियोगितामा भाग लिने आइसीसीले आधिकारिक जानकारी दिएको छ ।
बंगलादेश विश्वकपबाट बाहिरिएपछि पाकिस्तानले पनि विश्वकप बहिष्कार गर्नसक्ने संकेत गरेको छ । पाकिस्तान क्रिकेट बोर्डका अध्यक्ष मोसिन नक्वीले विश्वकपमा पाकिस्तानको सहभागिताको बारेमा सरकारले निर्णय गर्ने बताएर यसको संकेत गरेका हुन् । यसअघि पाकिस्तानले बंगलादेशले भारतमा नखेल्ने बताएको विषयमा उसको समर्थन गरेको थियो ।
टी-२० विश्वकप फेब्रुअरी ७ मा भारत र श्रीलंकामा सुरु हुँदैछ। पाकिस्तानका खेलहरू श्रीलंकामा खेलिदै छ ।
आईसीसीले शनिबार आधिकारिक घोषणा गर्नुभन्दा केही समय अघि, पाकिस्तान क्रिकेट बोर्डका अध्यक्ष मोहसिन नक्वीले यस मुद्दामा पाकिस्तान बंगलादेशको साथमा रहेको र सरकारले आईसीसी टी-२० विश्वकपमा भाग लिन पाकिस्तानी टोलीलाई पठाउने कि नपठाउने भन्ने निर्णय गर्ने बताएका थिए ।
आइसीसी टी-२० विश्वकपमा सहभागिता सम्बन्धी प्रश्नको जवाफमा शनिबार लाहोरको गद्दाफी स्टेडियममा मिडियासँग कुरा गर्दै उनले भने- ‘पाकिस्तान सरकारले हामीलाई जे गर्न आदेश दिन्छ हामी त्यही गर्नेछौं । प्रधानमन्त्री शाहबाज शरीफ अहिले पाकिस्तानमा छैनन् । उहाँ फर्किएपछि हामी तपाईंलाई अन्तिम निर्णयको बारेमा जानकारी गराउन सक्षम हुनेछौं । हामी आईसीसी भन्दा पाकिस्तान सरकारको नियन्त्रणमा छौं, त्यसैले हामीले सरकारले भनेको कुरा गर्नुपर्छ ।’
उनले यदि पाकिस्तान र भारत बीचको खेलको लागि हाइब्रिड प्रणाली अपनाउन सकिन्छ भने, बंगलादेशको लागि किन सकिदैन भन्दै प्रश्न गरेका छन् ।
एक प्रश्नको जवाफ दिँदै उनले विश्वकप बहिष्कारको निर्णय भयो भने, आफुहरुसँग धेरै अन्य योजनाहरू रहेको बताए ।
बंगलादेशको आइसीसीसँगको समबन्ध बिग्रिएपछि अब उसको क्रिकेट भविष्य के हुने भन्ने पनि प्रश्न उठेका छन् । आइसीसीका प्रतियोगितामा सहभागी हुदा आउने ठुलो धनराशीका साथै आइसीसीले बार्षिक रुपमा बंगलादेशलाई दिने सहयोग समेत प्रभावित हुने देखिएको छ । यसले बंगलादेशको क्रिकेटलाई कैयौं बर्ष पछाडी धकेलेको विश्लेषण गरिएको छ ।
