दीपेन्द्र प्रजापति/कालो झोला ।
बीरगंज, १६ मंसिर । ईलाका प्रहरी कार्यालय, पटेर्वा सुगौलीले विशेष सूचनाको आधारमा सोमबार दिउँसो करिब ०४:०० बजेको समयमा प्रतिवन्धित लागु औषध गाँजा सहित दुई जना मानिस सहित एउटा गाडी आफ्नो नियन्त्रणमा लिएको छ ।
उक्त दिन पर्सा जिल्लाको पटेर्वा सुगौली गाउँपालिका वडा नं. ०२, रंगपुर स्थितमा प्रतिवन्धित लागु औषध ओसार पसार कार्य भइरहेको छ, भने सूचनाको आधारमा त्यहाँ बाट खटिएको प्रहरी टोलीले सवारी साधन तथा पदैल यात्रुहरूलाई चेक जाँच गर्ने क्रममा मनवा बाट रंगपुर जाँदै गरेको BA B ९३९८ नम्बरको मारुती सुजुकी कार लाई रोकी रितपूर्वक खान तलासी गर्दा उक्त कार भित्र प्लास्टिकले लुकाई छिपाई राखिएको लागु औषध गाँजा जस्तो देखिने बनस्पति १० पोकामा १ सय ०४ के. जी. ३ सय २५ ग्राम फेला परेको थियो ।
सोही क्रममा बरामद लागु औषध सहित उल्लेखित नम्बरको कार र मकवानपुर जिल्लाको भिमफेदी गाउँपालिका वडा नं. ०८, महावीर टोल बस्ने वर्ष ३२ को भीम स्याङ्तान (चालक) तथा मकवानपुर गढी गाउँपालिका वडा नं. ०१, आपटार बस्ने वर्ष ३८ को कुमार स्याङ्तान लाई नियन्त्रणमा लिई जिल्ला प्रहरी कार्यालय, पर्सा मा ल्याइ थप अनुसन्धान कार्य भइरहेको कुरा पर्सा प्रहरीका प्रवक्ता एवम् सूचना अधिकारी प्रहरी नायब उपरीक्षक राजु कार्कीले बताएका छन् ।
