बिष्णुप्रसाद तिमल्सिना
काठमाडौँ, २९ साउन । साउने सोमबारको अवसर पारी सामुदायिक सेवा समाजले झुला कार्यक्रम भव्यताका साथ सम्पन्न गरेको छ । मैजुबहाल,कुमारीगालस्थित शहीदस्मृति सामुदायिक भवनको सभाहलमा आयोजित उक्त झुला कार्यक्रममा कुमारीगाल, मैजुबहाल र गौरीघाट आसपासका स्थानीयवासीहरुको उल्लेख्य उपस्थितिमा उक्त कार्यक्रम सम्पन्न भएको हो ।
सामुदायिक सेवा समाजका पदाधिकारी, सामुदायिक योग समूहका पदाधिकारीहरु तथा अन्य स्थानीय महिला तथा पुरुषहरुको साथसहयोगमा सम्पन्न उक्त झुला कार्यक्रममा पण्डित सागर आचार्यलगायतको टोलीले प्रवचनसहित सांगेतिक प्रस्तुत गरेको थियो । भजनकीर्तनसहित नाचगानसहित झुलामा भोजप्रसादी चढाउनुका साथै बालगोपालको झुला झाँकी समेत बडो रोचक ढंगमा प्रस्तुत भइरहँदा स्थानीयवासीहरु मन्त्रमुग्घ बनेका थिए ।
सामुदायिक सेवा समाजका अध्यक्ष शिवराम अर्यालले स्थानीयबासीहरुमा धर्मसंस्कृतिप्रतिको आस्था र विश्वासलाई नयाँ पुस्तामा समेत हस्तान्तरण गर्ने उद्देश्यका साथ झुला कार्यक्रम आयोजना भएको बताउनुभयो ।
त्यस्तै, झुला कार्यक्रमको प्रचारप्रसारसहित भोगप्रसाद व्यवस्थापन सङ्कलन गर्ने कार्यमा सामुदायिक सेवा समाजकी वरिष्ठ उपाध्यक्ष विनु खत्री क्षेत्री र कोषाध्यक्ष विष्णुप्रसाद तिमल्सिनाले महत्वपूर्ण भूमिका निर्वाह गर्नुभएको थियो । कार्यक्रममा करीब ३०० जना स्थानीयवासीहरूको उपस्थिति रहेको थियो ।
