ब्रेन्ट कच्चा तेलको मूल्य बढेको छ । अमेरिकी राष्ट्रपति डोनाल्ड ट्रम्पले होर्मुज जलडमरू खोलिएन भने इरानका ऊर्जा संरचनामा आक्रमण गर्ने चेतावनी दिएपछि अन्तर्राष्ट्रिय तेल बजारमा उछाल देखिएको हो ।
अन्तर्राष्ट्रिय मापदण्ड मानिने ब्रेन्ट कच्चा तेलको मूल्य १.४ प्रतिशतले बढेर प्रतिब्यारेल ११०.६० डलर पुगेको छ । त्यस्तै अमेरिकी कच्चा तेल १. ८ प्रतिशतले बढेर ११३. ६० डलरमा कारोबार भएको छ ।
ट्रम्पले सामाजिक सञ्जालमार्फत इरानलाई कडा चेतावनी दिएका थिए । उनले मंगलबारसम्म जलडमरू नखोलिए ऊर्जा पूर्वाधारमा कडा कारबाही हुने संकेत दिएका छन् । केही घण्टापछि उनले नयाँ समयसीमा तोक्दै मंगलबार साँझ ८ बजे (पूर्वी समय) अन्तिम म्याद हुने उल्लेख गरेका छन् ।
यसको जवाफमा इरानका एक वरिष्ठ अधिकारीले युद्धबाट भएको क्षतिको पूर्ण क्षतिपूर्ति नपाएसम्म होर्मुज जलडमरू नखोलिने बताएका छन् ।
यसअघि पनि ट्रम्पले मार्च २१ मा दुई दिनको समयसीमा दिएका थिए, जसलाई पछि अप्रिल ६ सम्म लम्ब्याइएको थियो । पछिल्लो चेतावनी भने अघिल्लो सातासम्म अमेरिकालाई उक्त जलडमरू आवश्यक नरहेको ट्रम्पको भनाइसँग विपरीत देखिएको छ ।
विश्लेषकहरूका अनुसार होर्मुज जलडमरू विश्व ऊर्जा आपूर्तिको प्रमुख मार्ग भएकाले यस क्षेत्रमा तनाव बढ्दा तेल मूल्यमा थप उतारचढाव आउने सम्भावना रहेको छ ।
