आगामी फागुन २१ गते हुने प्रतिनिधिसभा निर्वाचन नजिकिँदै गर्दा देशका विभिन्न स्थानमा देखिएका गतिविधिप्रति राष्ट्रिय मानव अधिकार आयोगले गम्भीर ध्यानाकर्षण जनाएको छ ।
आयोगले निर्वाचनपूर्व अनुगमन कार्यलाई तीव्र बनाउँदै शान्तिसुरक्षा र निष्पक्ष निर्वाचन वातावरण सुनिश्चित गर्न सबै पक्षलाई सचेत रहन आग्रह गरेको छ ।
दाङ, रौतहट, पर्सा लगायतका जिल्लामा दल र समूहबीच विवाद बढ्दै निषेधाज्ञासम्म जारी गर्नुपरेका घटनाले निर्वाचन र शान्तिसुरक्षामा चुनौती थपिएको आयोगको भनाइ छ । दलका नेता तथा कार्यकर्ताबाट हुने अमर्यादित र घृणायुक्त अभिव्यक्तिले वातावरण झनै बिग्रन सक्ने चेतावनी दिइएको छ ।
आयोगले निर्वाचन आचारसंहिता विपरीत प्रचारप्रसारमा प्रत्यक्ष वा परोक्ष रूपमा बालबालिकाको प्रयोग भएकोप्रति पनि चिन्ता व्यक्त गरेको छ । सामाजिक सञ्जाल तथा विभिन्न माध्यममार्फत बालबालिकालाई संलग्न गराइएको विषय अनुगमनका क्रममा देखिएको जनाएको छ ।
निर्वाचनलाई शान्तिपूर्ण, भयरहित र मानवअधिकारमैत्री ढङ्गले सम्पन्न गर्न सबै दल, उम्मेदवार, नागरिक समाज, विद्यालय, अभिभावक तथा सरोकारवालाले संयमता अपनाउन, घृणायुक्त अभिव्यक्ति नदिन र बालबालिकाको प्रयोग नगर्न आयोगले आग्रह गरेको छ ।
