दीपेन्द्र प्रजापति/कालो झोला ।
बीरगंज, ०६ पौष । जिल्ला प्रहरी कार्यालय, पर्सा तथा वडा प्रहरी कार्यालय, श्रीपुर ले विशेष सूचनाको आधारमा शनिवार राति करिब ०७:३० बजेको समयमा बीरगंज महानगरपालिका वडा नं. २२, जगरनाथपुर ढाँट स्थित सडक खण्ड बाट प्रतिवन्धित लागु औषध चरेश सहित दुई जना मानिस र ट्रक आफ्नो नियन्त्रणमा लिएको छ ।
हिजो राति त्यहाँ बाट खटिएको संयुक्त प्रहरी टोलीले सवारी साधनहरू चेक जाँच गर्ने क्रममा मकवानपुर बाट वीरगञ्ज तर्फ आउँदै गरेको ना. ३ ख ५०९३ नम्बरको ट्रकलाई रोकी कानूनी रितपुर्याई जाँच गर्दा उक्त ट्रकको क्याबीनको माथि फल्स बनाई लुकाइ छिपाई राखिएको लागु औषध चरेश जस्तो देखिने पदार्थ २ सय ४० के. जी. फेला परेकोले ट्रक चालक मकवानपुर जिल्लाको थाहा नगरपालिका वडा नं. ११ बस्ने वर्ष २९ को सरोज मोक्तान र उक्त ट्रकमा सवार सोही ठाउँ बस्ने वर्ष २१ को नवराज लोव्यक्तिलाई बरामद लागु औषध सहित नियन्त्रणमा लिइ थप अनुसन्धान कार्य भइरहेको कुरा आज आयोजित पत्रकार सम्मेलनमा प्रहरी उपरीक्षक सुदिप राज पाठक ले बताएका छन् ।
