दीपेन्द्र प्रजापति/कालो झोला ।
बीरगंज, १५ श्रावण । जिल्ला प्रहरी कार्यालय, पर्सा ले विशेष सूचनाको आधारमा आज बिहान करिब ०५:१५ बजेको समयमा १३ कार्टुन भारतीय कुखुराको चल्ला बरामद गरेको छ ।
एक्का बिहानै अबैध रुपमा तस्करहरुले भारतीय कुखुराको चल्ला भन्सार छली चोरी पैठारी गरी क्वारेन्टाईनको चेकजाँच समेत नगराई अबैध रुपमा लुकाई छिपाई नेपाल तर्फ भित्राउँदै गरेको अवस्थामा पर्सा जिल्लाको विन्दवासिनी गाउँपालिका वडा नं. ०३ को छठीया घाट स्थित सडक खण्डमा भारतीय कुखुराको चल्ला १३ कार्टुनमा १ हजार ४ सय गोटा ल्याउदै गरेको अवस्थामा त्यहाँ बाट खटी गएको प्रहरी टोलीलाई देख्नासाथ उक्त कुखुराको चल्ला छाडी भागी फरार भएकोले वेवारिसे अवस्थामा फेला पारी बरामद गरी थप अनुसन्धान तथा आवश्यक कारवाहीको लागि आजै बिहान करिब ११:३० बजेको समयमा पशु क्वारेन्टाइन चेक पोष्ट, सिर्सिया पर्सामा बुझाइएकोमा उल्लेखित चल्लाहरु पशु क्वारेन्टाइन चेक पोष्ट सिर्सिया द्वारा नष्ट गरिएको कुरा सूचना अधिकारी प्रहरी नायब उपरीक्षक दीपक भारति ले बताएका छन् ।
