पोखरामा जलवायु उत्थानशील तथा हरित लगानी बारे पोखरा महानगर र एसियाली विकास बैङ्कबीच छलफल भएको छ । जलवायु परिवर्तनको असर न्यूनीकरण र दिगो आर्थिक विकासका लागि हरित तथा उत्थानशील वित्त लगानी कार्यक्रम सम्बन्धी छलफल भएको हो ।
सो क्रममा नगर प्रमुख धनराज आचार्यले महानगरको कृषि रणनीति र पर्यटन विकासका प्राथमिकताहरू बारे जानकारी गराउँदै आफूहरू उक्त कार्यक्रममा सहकार्य गर्न तयार रहेको बताए । पोखरामा कृषि तथा पर्यटन विकासका थुप्रै सम्भावनाहरू रहेको उल्लेख गर्दै उनले विकास साझेदारहरूसँगको सहकार्यमा यसलाई अझ नतिजामुखी बनाउन सकिने बताए ।
एडिबीका कन्ट्री अपरेसन हेड आर्नो हेकम्यानले पोखराको आर्थिक वृद्धिका लागि निजी क्षेत्र, सहकारी र साना तथा मझौला उद्योगहरूसँग मिलेर जलवायु जोखिम न्यूनीकरण र हरित रोजगारी सिर्जना गर्न प्रतिबद्ध रहेको बताए ।
जापान सरकारको आर्थिक सहयोगमा सञ्चालन हुने यो कार्यक्रमले नेपालमा जलवायु परिवर्तनका चुनौतीहरू सामना गर्दै समावेशी आर्थिक वृद्धिलाई अभिवृद्धि गर्ने लक्ष्य राखेको छ । यस कार्यक्रमले विशेष गरी कृषि व्यवसाय र पारिस्थितिक पर्यटनलाई प्राथमिकता दिँदै स्थानीय पूर्वाधार विकास र नवप्रवर्तनमा लगानी गर्नेछ ।
यस परियोजनाले अनुदान, सहुलियतपूर्ण ऋण र निजी पुँजीको मिश्रणमार्फत स्थानीय आर्थिक क्षमतालाई उजागर गर्ने योजना बनाएको छ । नेपालको राष्ट्रिय अनुकूलन योजना र स्थानीय अनुकूलन कार्ययोजनसँग समन्वय गर्दै पोखराको कृषि रणनीति र विकास प्राथमिकताहरूमा सहकार्य गर्ने जनाइएको छ । यस प्रकारको सहकार्यले पोखरालाई वातावरणमैत्री र आर्थिक रूपमा सबल सहर बनाउन कोशेढुङ्गा साबित हुने विश्वास लिइएको महानगरले जनाएको छ ।
