दीपेन्द्र प्रजापति/कालो झोला ।
बीरगंज, ०१ पौष । प्रहरी चौकी, सिर्सिया, पर्सा ले विशेष सूचनाको आधारमा सोमबार राति करिब ०८:०० बजेको समयमा प्रतिवन्धित लागु औषध गाँजा सहित पिक अप गाडी र मानिस आफ्नो नियन्त्रणमा लिएको छ ।
वीरगञ्ज महानगरपालिकाको वडा नं. १७, कोनिया स्थित सामुदायिक अस्पताल, अलौ बाट कोनिया जाने ग्राबेल सडक खण्डमा बा. २१ च ७८५५ नम्बरको पिकअप गाडीलाई रोकी चेक जाँच गर्दा गाडीको पछाडि पट्टी प्लाष्टिकको बोरामा लागु औषध गाँजा जस्तो देखिने पदार्थ परालले छोपी लुकाइ छिपाइ राखिएको अवस्थामा बरामद भएको छ ।
लागु औषध गाँजा जस्तो देखिने पदार्थ १२ पोकामा १ सय ७६ के. जी. फेला परेकोले उल्लेखित नम्बरको पिकअप गाडी र चालक रामेछाप जिल्लाको खाडादेवी गाउँपलिका वडा नं. ०१ बस्ने वर्ष २८ को सुबराज श्रेष्ठलाई बरामद लागु औषध गाँजा सहित नियन्त्रणमा लिइ थप अनुसन्धान कार्य भइरहेको कुरा जिल्ला प्रहरी कार्यालय, पर्सा का प्रमुख प्रहरी उपरीक्षक सुदिप राज पाठक ले आज आयोजित पत्रकार सम्मेलनमा बताएका छन् ।
