काठमाडौँ । आर्टिफिसियल इन्टेलिजेन्स (एआई) कम्पनी ओपनएआईले भारतको दिल्लीमा अफिस खोल्ने तयारी गरेको छ । ओपनएआईले कार्यालय ठाउँ भाडामा लिएर कम शुरु गरको भारतीय मिडियाहरुले उल्लेख गरेका छन् । यो ओपनएआईको भारतमा कम्पनीको पहिलो कार्यालय हुनेछ।
इकोनोमिक टाइम्सको रिपोर्ट अनुसार, च्याटजीपीटीको मूल कम्पनी, ओपनएआईले यस वर्ष अगस्टमा भारतमा कार्यालय खोल्ने आफ्नो मनसाय घोषणा गरेको थियो । यसका साथै, ओपनएआईले भारतमा सरकार, व्यवसाय र विकासकर्ताहरूसँग काम गर्न स्थानीय टोली निर्माण गरिरहेको छ ।
ओपनएआईका सीईओ साम अल्टम्यानले अगस्टमा भारतमा आफ्नो पहिलो कार्यालय खोल्नु कम्पनीको भारतको लागि र यसका साथ एआई विकास गर्ने योजनाको एक प्रमुख भाग भएको बताएका थिए ।
कम्पनीले प्रयोगकर्ताहरूको हिसाबले भारत अमेरिका पछि दोस्रो ठूलो बजार भएको र यसको सबैभन्दा छिटो बढ्दो बजारहरू मध्ये एक भएको बताएको छ । गत वर्ष, भारतमा च्याटजिपिटीका साप्ताहिक सक्रिय प्रयोगकर्ताहरू चार गुणाभन्दा बढी बढेका छन् । यति मात्र होइन, भारत ओपनएआई विकासकर्ताहरूको लागि शीर्ष पाँच बजारहरू मध्ये एक हो ।
भारतमा विश्वभर च्याटजिपिटी प्रयोग गर्ने विद्यार्थीहरूको संख्या सबैभन्दा बढी छ ।
कम्पनीले हालै दिल्लीको नरोजी नगरस्थित वर्ल्ड ट्रेड सेन्टरमा ४२ हजार वर्ग फुटको प्रिमियम कार्यालय ठाउँ भाडामा लिएको छ, जसमा ५०० भन्दा बढी कर्मचारी काम गर्नसक्ने बताइएको छ । यसमा ५ उच्च-प्रविधि बैठक कोठाहरू, निजी फोन बुथहरू, सहयोगी ठाउँहरू, र एक वर्कबेन्च क्याफे समेत रहेको छ ।
