दीपेन्द्र प्रजापति/कालो झोला ।
बीरगंज, १७ माघ । जनवरी २३, २०२६ का दिन सम्पन्न कार्यक्रममा मधेशी एसोसिएसन इन अमेरिका (MAA) का अध्यक्ष मनोज कुमार सिंहको प्रमुख आतिथ्यमा सम्पन्न कार्यक्रममा, MAA को स्थापना दिवस तथा १० औँ वार्षिकोत्सव पनि गरिमामय रूपमा मनाइयो ।
यस पावन अवसरमा, कर्ता (यजमान) समेत बसेर, MAA ले राम–सीता (राम–जानकी) मूर्ति स्थापनाका लागि $ ६ हजार अमेरिकी डलर सहयोग प्रदान गर्दै न्यूयोर्क स्थित सम्पूर्ण नेपाली हरूको धार्मिक आस्था र सांस्कृतिक पहिचानलाई स्थायी रूपमा संस्थागत गर्ने अभियानमा महत्वपूर्ण योगदान दिएको छ ।
यस अवसरमा बोल्दै MAA का अध्यक्ष सिंह ले भन्नुभयो— “न्यूयोर्क स्वस्थानी महोत्सव २०२६ जस्तो पवित्र र ऐतिहासिक कार्यक्रममा सहभागी भई मधेशी एसोसिएसन इन अमेरिकाको स्थापना दिवस तथा १० औँ वार्षिकोत्सव मनाउन पाउनु हाम्रो लागि गर्वको विषय हो ।
रिजउड नेपाली समाज (RNS) तथा सम्पूर्ण आयोजक टिम प्रति यस्तो सम्मानजनक अवसर प्रदान गर्नु भएकोमा हार्दिक धन्यवाद व्यक्त गर्दछु ।
यो सहकार्य केवल मधेशी समुदायको पहिचान प्रवर्द्धनमा सीमित छैन, बरु यसले सम्पूर्ण नेपाली डायस्पोरा भित्र समावेशिता, एकता र आपसी विश्वासको दीर्घकालीन विरासत निर्माण गरिरहेको छ । यस्ता सहकार्यहरू नै भविष्यमा बलियो, एकीकृत र समृद्ध नेपाली समुदायको आधार बन्ने छन् ।”
