बलिवुड अभिनेता रणवीर सिंह अभिनित फिल्म ‘धुरन्धर’ लाई ६ खाडी देशहरूमा प्रतिबन्ध लगाइएको छ ।
फिल्म निर्माताहरूको उत्कृष्ट प्रयासको बावजुद, प्रदर्शनको लागि अनुमति दिइएको छैन । बलिउड हंगामाको रिपोर्ट अनुसार, फिल्म धुरन्धर बहराइन, कुवेत, ओमान, कतार, साउदी अरेबिया र युएईमा रिलिज नहुने भएको छ । यी देशका अधिकारीहरूले फिल्मको पाकिस्तान विरोधी अडानलाई उद्धृत गर्दै फिल्मको रिलिजलाई अनुमति दिन अस्वीकार गरेका छन् । फिल्मलाई ‘पाकिस्तान विरोधी फिल्म’ मानिएकोले ‘धुरन्धर’ कुनै पनि खाडी देशमा रिलिज भएको छैन ।
फिल्मले भारतीय बक्स अफिसमा भने शानदार कमाई गरिरहेको छ । फिल्मले पहिलो सातामा २१८ करोड कमाई गरिसकेको छ भने अहिले पनि यसको रफ्तार कम भएको छैन । यहि गतिमा अगाडी बढेमा फिल्मले अझै कैयौं रेकर्ड बनाउने देखिएको छ ।
फिल्ममा रणवीर सिंहले एक गुप्तचर एजेन्टको भूमिका निर्वाह गरेका छन्, जो पाकिस्तानमा गुप्तचर मिसनमा जान्छन् । उनीसँगै सारा अर्जुन मुख्य भूमिकामा छिन् । फिल्ममा अक्षय खन्ना, संजय दत्त, अर्जुन रामपाल, आर. माधवन पनि महत्त्वपूर्ण भूमिकामा छन् । यो फिल्मलाई उरी फेम निर्देशक आदित्य धरले निर्देशन गरेका हुन् ।
