काठमाडौँ, पुस १६ गते । अङ्ग्रेजी नयाँ वर्ष २०२४ को पहिलो दिन आज नेपाल लगायत विभिन्न देशहरुमा रहेका नेपालीहरुले ‘राष्ट्रिय नेपाली टोपी दिवस’ भव्यताका साथ मनाएका छन् । विशेषगरी यो दिवस नेपाली टोपीको प्रवर्द्धन गर्ने उद्देश्यका साथ केही वर्षहरुदेखि मनाइँदै आएको छ । यो लहरसँगै पछिल्लो समय नेपाली टोपी लगाउनेको सङ्ख्या बढेको छ।

मुलुकमा पश्चिमा संस्कृतिको प्रभाव बढ्दै गएको भन्दै केही युवाको अगुवाइमा २०७० सालदेखि हरेक वर्षको जनवरी १ लाई टोपी दिवस र पौष १६ गतेलाई राष्ट्रिय पोसाक दिवसको रूपमा मनाउन सुरु गरेका थिए।

नेपाल बाहिर रहेका नेपाली र नेपालीभाषीहरुले पनि नेपाली टोपी लगाउने गर्छन्। नेपाली टोपीको साइनो बङ्गलादेशको ढाका, काश्मीर, टर्की, कैलाश पर्वत र पाल्पासँग जोडिन्छ।

विशेषतः भादगाउँले टोपी र ढाका टोपीलाई नेपाली टोपीका रूपमा लिने गरिन्छ। तर नेपालका विभिन्न समुदायले आ–आफ्नो पहिचान र परम्परा झल्किने खालका टोपी लगाउने गरेका छन्।