काठमाडौँ । वायुसेवा सञ्चालक संघ नेपालले सोमबारदेखि बुधवारसम्म सरकारले तोके बमोजिमको लिँदै आएको अपर लिमिटको भाडा दरमा हवाई टिकट नबेच्ने निर्णय गरेको छ ।
संघका अध्यक्ष मनोज कार्कीले आइतबार विज्ञप्ति निकालेर विपद्को घडीलाई मध्यनजर गर्दै २०८१ असोज १४ गते सोमवारदेखि असोज १६ गते बुधवारसम्म नेपाल सरकारले तोके बमोजिम लिँदै आएको अपर लिमिटको भाडा दरमा टिकट नबेच्ने निर्णय गरिएको जानकारी गराएका हुन । हवाई इन्धन परल मूल्यमै उपलब्ध गराएको अवस्थामा हवाई टिकट अझै सस्तो हुने संघले जनाएको छ ।
हवाई इन्धनको मूल्यमा अधिक नाफा नलिने र परल मूल्यमा नै उपलब्ध गराएको अवस्थामा फ्युल चार्ज घट्ने र हवाई यात्रुलाई टिकेटको मूल्य सस्तो पर्ने भन्दै इन्धनको मूल्य घटाइदिन संघले आग्रह गरेको छ । साथै वायुसेवा सञ्चालक संघले ल्याण्डिङ, पार्किङ, नेभिगेसन, यात्रु सेवा शुल्कलगायतका अन्य शुल्कमा छुट दिएको अवस्थामा हवाई यात्रुलाई थप राहत हुने उल्लेख गरेको छ । बाढी पहिरोपछि सडक सञ्जाल क्षतविक्षत भएका कारण हवाई मार्गमा यात्रुको अत्यधिक चाप बढेको छ । नजिकिँदो दसैँ र स्थल मार्ग अवरुद्ध हुँदा हवाई सेवा सञ्चालकले भाडा बढाएको भन्दै विरोध भइरहेको थियो ।
