दीपेन्द्र प्रजापति/कालो झोला ।
वीरगंज, १६ माघ । वर्षाको पानी निकास नहुँदा बिगत दुई वर्ष देखि डुबानको सास्ती खेप्दै आएका वीरगंज महानगरपालिकाका तीन वडाका बासिन्दाले अन्ततः राहत पाएका छन् ।
महानगरको वडा नं. १७, २४ र २६ मा वर्षातका बेला हुने डुबानको समस्यालाई महानगरले योजनाबद्ध रूपमा समाधान गरे पछि स्थानीय बासिन्दामा खुसीयाली छाएको हो ।
यी क्षेत्रहरूमा वर्षाको पानीको प्राकृतिक निकास अवरुद्ध हुनुका साथै पर्याप्त नाला र पाइपलाइनको अभावले हरेक वर्ष बस्तीहरू जलमग्न हुने गरेका थिए । करिब हजारौं विगहा खेती डुबानमा रहेको कारण विगत दुई वर्ष देखि कुनै पनि बाली स्थानीय किसानहरुको घरमा नगएको ले अब आउने समयमा यो समस्या नहुने बताएका छन् ।
सडक र घर-आँगनमा समेत पानी जम्ने, घरभित्रै पानी पस्ने र आवतजावत ठप्प हुने समस्याले दैनिक जन जीवन कष्टकर बन्दै आएको थियो । समस्या समाधानका लागि यस अघि पनि पटक-पटक प्रयास भए तापनि स्थानीय स्तरमा कुरा नमिल्दा र प्राविधिक अवरोधका कारण दीर्घकालीन समाधान हुन सकेको थिएन ।
यसपटक महानगर प्रमुख राजेशमान सिंहले विशेष सक्रियता देखाउँदै प्रमुख जिल्ला अधिकारी, पर्सा प्रहरी प्रमुख र सम्बन्धित सरोकारवालाहरूलाई राखेर निकासको गाँठो फुकाउन पहल गर्नु भएको थियो । स्थानीय बासिन्दा सँगको निरन्तर संवाद र समन्वय पछि अवरुद्ध निकास खोल्न सहमति जुटेको हो ।
महानगरको प्राविधिक टोलीले स्थलगत निरीक्षण गरी पानी जम्ने मुख्य बिन्दुहरूको पहिचान गरे पछि त्यहाँ ठूला ह्युम पाइप (ड्रेनेज पाइप) जडान गरी संरचनागत सुधार गरिएको छ ।
हाल जडान गरिएका नयाँ संरचनाका कारण वर्षौँ देखि जमेर बस्ने पानी सहजै बाहिर निस्कन थालेको छ । स्थानीय बासिन्दाले लामो समय देखिको पीडा अन्त्य भएकोमा महानगरको पहल प्रति आभार प्रकट गर्दै अब वर्षायाममा ढुक्कले बस्न पाउने विश्वास व्यक्त गरेका छन् ।
महानगरका प्रमुख प्रशासकीय अधिकृत अरविन्द लाल कर्णले यो सफलतालाई शहरी व्यवस्थापनको महत्वपूर्ण उपलब्धिका रूपमा लिनु भएको छ । उहाँका अनुसार महानगरले आगामी दिनमा अन्य डुबान प्रभावित क्षेत्रहरूको पनि पहिचान गरी क्रमशः निकासको काम अघि बढाउने छ ।
साथै, निर्मित संरचनाहरूको नियमित अनुगमन, मर्मत र सरसफाइलाई प्राथमिकतामा राखेर शहरी पूर्वाधारलाई थप सुदृढ बनाउने लक्ष्य महानगरले लिएको छ ।
