दीपेन्द्र प्रजापति/कालो झोला ।

जनकपुर, ०७ चैत । धनुषा जिल्लाको मिथिला नगरपालिका वडा नं. ०२ मा स्थित सतलोक आश्रम धनुषामा जगतगुरु तत्वदर्शी सन्त रामपालजी महाराजको सान्निध्यमा सन्त गरीब दास जी महाराजको बोध दिवसको उपलक्ष्यमा चैत्र ०६ गते देखि ०८ गते सम्मका लागि आयोजना गरिएको अमर ग्रन्थ साहेबको अखण्ड पाठ तथा विशाल भन्डारा कार्यक्रम अन्तर्गत दोस्रो दिन बुधबार अनुयायीहरु द्वारा हजारौं युनिट रक्तदान तथा आठ जोडीहरुको दाइजोरहित रमैणी विवाह सम्पन्न भएको छ ।

सन्त गरीब दास जी महाराजलाई वि.सं. १७८३ मा आज कै दिनमा पूर्ण परमात्मा कबीर साहेब जीले जिन्दा बाबाको भेषमा प्रकट भएर भारतको हरियाणा प्रान्त स्थित छुडानी गाउँको चौरीमा रहेको जण्डी वृक्षको फेदमा बसेर मन्त्र उपदेश दिनुभएको थियो । कबीर साहेबबाट मन्त्र दिक्षा प्राप्त गरेको दिनको सम्झनामा उहाँको बोध दिवस मनाइन्छ । मन्त्र उपदेश पश्चात बालक गरीबदासको आत्मालाई लिएर कबीर साहेबजीले जिवितमै सतलोक तथा ब्रह्मा,विष्णु,शिव,धर्मराजको लोक लगायत अन्य सर्व लोकहरु देखाउनुभएको थियो । तीन दिन बितेपछि मृत भनेर जब बालक गरीबदासलाई चितामा राखेर जलाउन लागेका थिए तब उहाँको आत्मालाई फिर्ता पठाउनु भएको थियो र उहाँ चितामै जिवित हुनु भएको थियो ।

आश्रममा यसरी गराइएका दाइजो तथा आडम्बर रहित विवाहमा कुनै किसिमको दाइजो, नगद लेनदेन नभएको र विवाहमा आगन्तुक सबैलाई आश्रम बाटै शुद्ध घ्युमा बनेको हलुवा,लड्डु,बर्फी, जेरी प्रसाद तथा अन्य परिकारहरुको व्यवस्था भोजनको रुपमा गरिएको आयोजकले जनाएको छ । समाज सुधार र परोपकारका कार्यहरुमा जहिल्यै पनि सन्त रामपालजी महाराजका अनुयायीहरु अग्रसर रहने र आगामी दिनहरुमा पनि यस्ता कार्यक्रमहरुलाई बढाउँदै लैजानुका साथै समाजलाई छिट्टै नै सर्व विकृतिमुक्त बनाउने दाबी आयोजकले गरेका छन् ।

चैत्र ०६ गते पाठ प्रकाश आरती गरी प्रारम्भ भएको यस कार्यक्रममा नेपाल,भारत भुटान लगायत अन्य विभिन्न देशहरुबाट गरी लाखौंको संख्यामा श्रद्धालुहरुको सहभागीता रहेको थियो। यस अवसरमा विश्वभर ११ वटा ठूला ठूला आश्रमहरुमा यो भव्य कार्यक्रम भैरहेको आयोजकले जनाएको छ।

गरीबदासजी सँग संबंधित मुख्य घट्नाहरुलाई दर्शाउनका लागि आध्यात्मिक प्रदर्शनीको पनि लगाइएको छ जसमा विभिन्न चित्रहरु हुबहु घट्ना भए जस्तै देखिन्छन् र त्यस घट्नाक्रमलाई बुझाउन सेवादारहरु पनि खटाइएका छन् ।

उक्त कार्यक्रममा पुर्व मन्त्री राजलाल यादव, सप्तरी जिल्ला समन्वय समितिका सभापति शिवनारायण साह, उपसभापति शम्भु यादव लगायत थुप्रै विशिष्ट व्यक्तिहरुको उपस्थिति रहेको थियो । विभिन्न सञ्चार माध्यम का साथै सामाजिक सञ्जालहरुमा पनि यस कार्यक्रमको प्रत्यक्ष प्रसारण भईरहेको छ र कार्यक्रमको अन्तिम दिन चैत्र ०८ गते सम्म यसको प्रत्यक्ष प्रसारण हेर्न सकिने आयोजकले जनाएको छ ।