दीपेन्द्र प्रजापति/कालो झोला ।
वीरगंज, १८ भदौ । सरसफाईलाई दिगो र प्रभावकारी बनाउन वीरगंज महानगरपालिका कडा एक्सनमा उत्रिएको छ ।
जरिबाना मार्फत शहर सर सफाई लाई क्लिन बनाउँदै आएको महानगरले अब माइकिङ मार्फत टोल टोलमा पुगेर सचेत गराउन पनि सुरु गरेको हो । सडक तथा खाली स्थानमा जथाभावी फोहोर नफाल्न भन्दै टोल टोलमा पुगेर सचेत गराउन थालिएको सरसफाई शाखा प्रमुख सर्फुद्दिन मियाँले जानकारी दिएका छन् ।
नगरलाई सफा स्वच्छ राख्ने नगर प्रमुखको सोच बमोजिम सडक तथा खाली स्थानमा जथाभावी फोहोर नफाल्न भन्दै माइकिङ मार्फत टोल टोलमा पुगेर नागरिक स्तरमै सचेतना जगाउने कार्य सुरु गरिएको उनले बताए ।
‘जरिबाना मात्रै नभई नागरिकलाई फोहोर गर्नु हुँदैन भन्ने धारणा वृद्धि गराउन सचेतना गराउने अभियान थालिएको हो,’ उनले भने ‘यो अभियान अन्तर्गत हरेक दिन हामी टोल टोलमा पुगेर नागरिकलाई सचेत गराउने छौँ ।’
यसका साथै महानगरले सडकका पोल र भित्तामा जथाभावी पर्चा पम्प्लेट टाँस्न रोक लगाएको छ । शहरलाई अशोभनीय बनाएको भन्दै महानगरले नगर सचेतना अभियान थाल्दै पर्चा, पम्प्लेट र होडिङ्ग बोर्ड जथाभावी लगाउन रोक लगाएको हो ।
पछिल्लो समय विभिन्न विज्ञापनहरुको पर्चा पम्प्लेट विद्युत पोल, सडक तथा भवनका भित्ताहरुमा टाँस्ने गरिएको छ । कलेजहरुले पनि विज्ञापनका होडिङ बोर्ड तथा ब्यानरहरु राख्ने गरेका छन् । तर अब कुनै पनि व्यक्ति वा संघ संस्थाले अनुमति नलिई जथा भावी रुपमा पर्चा, पम्लेट, ब्यानर टाँस्ने वा झुण्ड्याउन नपाउने महानगरले बताएको छ । कसैले टाँसेको पाइएमा उसलाई कारबाही गर्नुका साथै त्यसमा लेखिएको संस्थालाई पनि कारबाही हुने शाखा प्रमुख मियाँले बताए ।
