दीपेन्द्र प्रजापति/कालो झोला ।
बीरगंज, ०४ मंसिर । सशस्त्र प्रहरी बल नेपाल प्रस्तावित सीमा सुरक्षा गुल्म, अलौ बाट गुल्मपति सशस्त्र प्रहरी नायब उपरीक्षक सुरज कुमार कार्कीको कमाण्डमा खटिएको ०७ जनाको टोलीले पर्सा जिल्लाको विन्दवासिनी गाउँपालिका वडा नं. ०३, झौवा स्थित सडक खण्ड मा चेकजाँच गर्ने क्रममा झौवा बाट विरगंज तर्फ आउदै गरेको ना ४ च ६९३५ नम्बरको पिक अप गाडिमा लोड गरी ल्याउदै गरेको कपडा बरामद गरी गाडी सहित भन्सार कार्यालय बुझाउदा मुल्य रु.२७ लाख १३ हजार ९ सय ४० कायम भएको तथा सोही गुल्मले सोही मितिमा मुल्य रु. २ लाख २२ हजार १ सय बराबरको मोटरसाईकल र गाडिको पार्टस समेत नियन्त्रणमा लिई बीरगंज भन्सार कार्यालय पर्सामा बुझाएको छ ।
यसै गरी सशस्त्र प्रहरी बल, नेपाल नं. १३ गण हे.क्वा. पर्साबाट खटिएको टोलीले जिल्ला पर्सा वीरगंज म.न.पा.-२२ जगरनाथपुरमा भारतबाट अबैध रुपमा भन्सार छली टाउकोमा बोकी परवानीपुरतर्फ लैजाँदै गरेको मुल्य रु. २ लाख ५४ हजार ६ सय बराबरको कपडा तथा ईलेक्ट्रोनिक्स सामानहरु नियन्त्रणमा लिई बीरगंज भन्सार कार्यालय पर्सामा बुझाएको छ ।
बुधबार नै बी.म.न.पा. वडा नं. १६, भन्सार मेनगेटमा प्र.सि.सु. गुल्म अलौ र प्र.सी.सु. गुल्म बिरगञ्ज पर्साबाट खटिएको संयुक्त टोलीले बिशेष सुचनाको आधारमा भारतबाट नेपाल तर्फ आउदै गरेको BR 05AV 5983 नम्बरको मो.सा.लाई चेक जाँच गर्ने क्रममा मोसा चालक जिल्ला पुर्वी चम्पारण नुनियाडी पञ्चायत -९ रक्सौल बस्ने अन्दाजी वर्ष २५ को आनन्द कुमारले लगाएको हेल्मेटमा लुकाई छुपाई राखेको नेपाली रुपैया रु. ३ लाख फेला परेकोले उक्त नगद, ब्यक्ति र सो कार्यमा प्रयोग गरिएको मोटरसाईकल को रु. १ लाख ५० हजार सहित नियन्त्रणमा लिई बिरगञ्ज भन्सार कार्यालय मा बुझाएको छ ।
साथै सशस्त्र प्रहरी बल नेपाल बिओपि, अमरपट्टी बाट खटिएको टोलीले पर्सा जिल्लाको विन्दवासिनी गा.पा.-३ स्थित छठियाघाटमा भारत बाट अबैध रुपमा नेपाल तर्फ ल्याउँदै गरेको मुल्य रु. २ लाख ७० हजार बराबरको ५ हजार ४ सय गोटा (५४ कार्टुन) ब्रोईलर कुखुराको चल्ला बरामद गरी आवश्यक प्रकृया पश्चात नष्ट गरिएको कुरा सुचना अधिकारी सशस्त्र प्रहरी नायब उपरीक्षक विश्वराज योन्जन ले बताएका छन् ।
