दीपेन्द्र प्रजापति/कालो झोला ।
बीरगंज, १० पौष । सशस्त्र प्रहरी बल, नेपाल नं. १३ गण हे.क्वा. पर्साले सीमावर्ती ईलाकाबाट हुने चोरी तस्करी तथा लागुऔषध ओसारपसारका घटनालाई निस्तेज तुल्याउने अभियानलाई तिव्रता दिदै आईरहेको छ । सीमा ईलाकामा कुनै पनि किसिमको अवैध सामाग्री भित्रिन नदिन प्रभावकारी सुरक्षा परिचालन मार्फत कडा निग्रानी राख्दै त्यस्ता सामाग्री भित्रिएमा तुरुन्तै कानुनी कारवाही गर्दै आईरहेको छ ।
लागुऔषध ओसारपसार नियन्त्रणलाई अभियान कै रुपमा संचालन गरिरहेको यस सशस्त्र प्रहरी बल नेपाल, पर्साले विभिन्न समयमा पर्सा जिल्लाका विभिन्न स्थानहरुबाट भारी मात्रामा लागुऔषध बरामद गरी सम्बन्धित कार्यालयमा बुझाउदै आईरहेको छ ।
गत मंसिर महिनामा मात्र विभिन्न स्थानहरुबाट ३ सय २३ के. जी. प्रतिबन्धित लागु औषध गाँजा र पौष ०९ गते विन्दबासिनी गापा-५ प्रसौनिभाठा स्थित धुताहा खोलाबाट १ सय २० के. जी. प्रतिबन्धित लागु औषध गाँजा बरामद गरी नेपाल प्रहरीलाई बुझाएको छ ।
सोही क्रममा आज सशस्त्र प्रहरी बल,नेपाल सीमा सुरक्षा गुल्म हे.क्वा.वीरगंज बाट खटिएको टोलीले वीरगंज महानगरपालिका वडा नं. १६, ईनर्वा स्थित पोखरीको डिलमा बेवारिसे अवस्थामा बोरा भित्र राखेको ७ सय ३८ पता मा (११ हजार ६८ गोटा ट्याब्लेट) नाईट्राभेट (NITRAVET-10) प्रतिबन्धित लागु औषध फेला पारेकोमा उक्त लागु औपध बरामद गरी आवश्यक कारवाहिको लागि प्रहरी चौकी, ईनर्वामा बुझाएको कुरा सूचना अधिकारी सशस्त्र प्रहरी नायब उपरीक्षक विश्वराज योन्जन ले बताएका छन् ।
