काठमाडौँ। अखिल नेपाल फुटबल संघ (एन्फा)का वरिष्ठ उपाध्यक्ष वीरबहादुर खड्काले हालै सम्पन्न साफ महिला च्याम्पियनसिप फुटबलको टिकट बिक्रीका अनियमितता भएको भन्दै छानविन हुनुपर्ने माग गरेका छन्।
काठमाडौँमा आइतबार पत्रकार सम्मेलन गर्दै उनले प्रतियोगिताको गेट टिकट बिक्रीमा नेपालको प्रचलित नियम कानुनका साथै एन्फाको आर्थिक नियमावली र कार्यविधिको उल्लंघन भएकोले अनियमितता र भ्रष्ट्राचार भएको उनको दाबी छ ।
‘एन्फाको एक जिम्मेवार पदाधिकारी भएकोले चुप लागेर बस्नु आम खेलाडी र फुटबल प्रेमीप्रति अन्याय हुन्छ’, उनले भने, ‘त्यसैले राज्यको नियमनकारी निकाय र आम फुटबल प्रेमी दर्शकको ध्यान आकृष्ट गराउन यो पत्रकार सम्मेलनको आयोजना गरेको छु ।’ यसका कारण एन्फालाई १ करोड ५० लाखको क्षति पुगेको उनको दाबी छ ।
टिकट विक्री लागि टेण्डर आव्हान गर्दा तोकिएको समय सीमा भित्र एउटा मात्र कम्पनीले आवेदन दिएको अवस्थामा अर्को सूचना प्रकाशित गर्नु पर्नेमा सोही कम्पनीसँग सम्झौता गर्नुमा बदनियत देखिएको तथा टेण्डर दिई सकेको अवस्थामा पुनः अवैधानिक तवरले सम्झौता खारेज गर्ने निर्णय पनि अपारदर्शी र स्वार्थ प्रेरित भएको उनको भनाइ छ ।
