काठमाडौँ । सिम्रिक एयरले बाढीपहिरो प्रभावित करिब दुई सय यात्रुको उद्धार गरेको छ । सिम्रिक एयरले बिहीबारदेखि परेको अविरल वर्षाका कारण बाटोमा अलपत्र परेका यात्रुको उद्धार गरेको हो ।
धुलिखेलबाट हेलिकप्टर सेवा सञ्चालन गरी रोशी, नेपालथोक र रामेछापमा अलपत्र परेका बिरामी/घाइते एवं अन्य यात्रुको उद्धार गरिएको हो । सिम्रिक एयरले आइतबार एउटा र सोमबार दुई वटा हेलिकप्टर प्रयोग गरी करिब दुई सय जना यात्रुलाई प्रकोपग्रस्त क्षेत्रबाट धुलिखेलसम्म ल्याएको कम्पनी श्रोतले जानकारी दियो । अन्य नियमित उडान समेत स्थगन गरी प्रकोपग्रस्त क्षेत्रको उद्धारमा हेलिकप्टरहरू परिचालन गरिएको सिम्रिक एयरले जनाएको छ । सिम्रिक एयरले इमर्जेन्सी रेस्पोन्स, रेस्क्यू/फायर फाइटिनिङका क्षेत्रमा विगत २३ वर्षदेखि सेवामा रहेको छ ।
