दुई अर्ब ६५ करोड ठगी भएको स्वर्णलक्ष्मीको मुद्दाबाट यसअघि सरकारले तीनपुस्ते नखुलेको भन्दै नियोजित रूपमा जोगाएको थियो सांसद राईलाई, तर सहकारीका महत्वपूर्ण निर्णय र संसद्मा उनले गरेको हस्ताक्षर ‘म्याच’
काठमाडौंको कालीमाटीस्थित स्वर्णलक्ष्मी सहकारीको ठगी प्रकरणमा कांग्रेस सांसद माया राईको संलग्नता पुष्टि हुने बलियो आधार भेटिएको छ । सहकारीका महत्वपूर्ण निर्णयहरूमा उनको हस्ताक्षर फेला परेपछि ठगी प्रकरणमा उनको प्रत्यक्ष भूमिका देखिएको हो । उनी दुई कार्यकाल स्वर्णलक्ष्मीको सञ्चालक समितिमा थिइन् ।
सहकारीका बैठकहरूमा गरिएको ‘माइन्युट’मा राईको हस्ताक्षर भेटिएपछि काठमाडौं प्रहरीले विस्तृत अनुसन्धान अघि बढाएको छ । दुई अर्ब ६५ करोड ठगी भएको स्वर्णलक्ष्मीको मुद्दाबाट यसअघि सरकारले तीनपुस्ते नखुलेको भन्दै नियोजित रूपमा उनलाई जोगाएको थियो । गत पुस २१ गते सहकारीको ठगी प्रकरणमा ३९ जनाविरुद्ध जिल्ला अदालत काठमाडौंमा मुद्दा दायर गरिएको थियो ।
नयाँ पत्रिकाले यसबारे समाचार प्रकाशन गरेपछि प्रहरीले दोस्रो चरणको अनुसन्धान थालेको हो । जिल्ला प्रहरी परिसर काठमाडौंका एक अधिकारीका अनुसार सहकारीका ‘माइन्युट’ र संसद्मा राइले गरेको हस्ताक्षर एक–अर्कासँग मेल खाएका छन् । ‘संसद्बाट ल्याइएको हस्ताक्षर सहकारीका कागजातसँग म्याच भएपछि विस्तृत अनुसन्धान अघि बढाएका छौँ,’ ती अधिकारीले भने ।
नवराज अधिकारी प्रवक्ता, जिल्ला प्रहरी परिसर काठमाडौं
यसअघि तीनपुस्ते नखुलेकालगायत थप व्यक्तिमाथि दोस्रो चरणको अनुसन्धान भइरहेको छ ।
काठमाडौं परिसरका प्रवक्ता नवराज अधिकारीले विगतमा तीनपुस्ते नखुलेकालगायत थप व्यक्तिमाथि दोस्रो चरणमा अनुसन्धान भइरहेको बताए । राई दुईपटक सहकारीको सञ्चालक भएकी थिइन् । सहकारीको सञ्चालक भएको आधारमा उनीविरुद्ध समेत पक्राउ पुर्जी लिएको थियो । तर, सरकारी वकिलमा अनुसन्धान प्रतिवेदन पुग्दा रहस्यमय रूपमा उनको नाम गायब भयो । सत्तारूढ दल कांग्रेसकी सांसद भएकाले उनलाई योजनाबद्ध रूपमा जोगाएको आरोप लाग्दै आएको छ । प्रहरीले भने सहकारीको सञ्चालक माया राई र सांसद माया राई एकै व्यक्ति भएको आफूहरूले समाचारमा आएपछि मात्र जानकारी पाएको दाबी गरेको छ ।
गितेन्द्रबाबु (जिबी) राईले सञ्चालन गरेको सो सहकारीमा सर्वसाधारणको दुई अर्ब ६५ करोड हिनामिना भएको प्रहरी अनुसन्धानमा खुलेको छ । सर्वसाधारणको जाहेरीका आधारमा एक अर्ब १९ करोड रुपैयाँबराबरको बिगो कायम गरी मुद्दा दायर भएको छ ।
भोजपुर घर भएकी राईको जिबी राईसँग निकटता थियो । सोही आधारमा उनी सहकारीको सञ्चालक बनेकी थिइन् । सहकारीमा आबद्ध भए पनि हिनामिनामा संलग्न नभएको उनले नयाँ पत्रिकासँग बताएकी थिइन् । तर, निर्णयहरूमै हस्ताक्षर भेटिएपछि उनी मुख्य प्रतिवादी हुने अवस्था देखिएको छ । राई सो सहकारीको दुईपटक सञ्चालक भएकी थिइन् ।
आर्थिक वर्ष ०७३/७४ मा उनी सदस्य थिइन् । त्यसवेला स्वर्णलक्ष्मीको सञ्चालकहरूमा कल्पनाकुमारी श्रेष्ठ अध्यक्ष, देवेन्द्रबाबु राई उपाध्यक्ष, गितेन्द्रबाबु राई सचिव, सविना आलेमगर कोषाध्यक्ष तथा यामकुमार नाल्बो, राजु बराल र राई सदस्य थिए ।
पछि ०७४/७५ देखि ०७५/७६ मा उनी सहसचिव हुँदा कल्पनाकुमारी श्रेष्ठ अध्यक्ष, देवेन्द्रबाबु राई उपाध्यक्ष, दीपक लामा सचिव, रविना आलेमगर कोषाध्यक्ष तथा भक्तबहादुर भोलन र प्रदीप लामा सदस्य थिए । त्यतिवेलादेखि नै गैरकानुनी रूपमा कर्जा प्रवाह हुँदा सहकारी धराशायी भएको अनुसन्धानमा देखिए पनि अन्य सञ्चालकलाई मुद्दा चलाउँदा उनलाई अनुसन्धानबाहिर राखिएको थियो । प्रारम्भिक अनुसन्धानमा उनको संलग्नता देखिएपछि प्रहरीले अदालतबाट पक्राउ पुर्जी लिएको थियो ।
त्यसैगरी, पक्राउ पुर्जी जारी भएर पनि तीनपुस्ते विवरण नखुलेको भन्दै मुद्दा दायर नगरिएका यामकुमार नाल्बो, सुरज श्रेष्ठ, पुनमकुमारी चालिसे, मीरा बमजन, सञ्जीव गिरीको हकमा पनि दोस्रो चरणमा अनुसन्धान थालिएको छ ।
सहकारीबाट गोर्खा मिडियामा गैरकानुनी रूपमा पैसा गएको र त्यो पैसा खर्च गर्ने भूमिकामा रहेको भन्दै गोर्खा मिडियाका तत्कालीन सञ्चालक रहेको भन्दै राष्ट्रिय स्वतन्त्र पार्टीका सभापति रवि लामिछानेविरुद्ध समेत मुद्दा दायर गरेको थियो । तर, सहकारीकै सञ्चालकदेखि सहकारीबाट प्रत्यक्ष रूपमा २० करोड लिने उमेश गुरुङलगायतमाथि भने मुद्दा दायर नगरेपछि प्रहरी अनुसन्धानमाथि प्रश्न उठेको थियो ।
जिबीका पार्टनर रहेका फिक्कल गाउँपालिका उपाध्यक्ष बराल अझै पक्राउ परेनन् 
स्वर्णलक्ष्मी सहकारीको ठगीमा प्रतिवादी रहेका सिन्धुलीको फिक्कल गाउँपालिकाका उपाध्यक्ष राजु बराल अझै पक्राउ परेका छैनन् । २१ पुसमा उनलाई फरार प्रतिवादी बनाएर मुद्दा दायर भएको थियो ।
बराल स्वर्णलक्ष्मीका पूर्वसञ्चालक हुन् । उनी एमालेबाट निर्वाचित हुन् । काठमाडौं प्रहरीले स्वर्णलक्ष्मीको सञ्चालक कमल लामा र सुनिता नेवालाई पक्राउ गरी अनुसन्धान गर्दा बराल गाउँपालिकामै कार्यरत थिए । पछि भूमिगत भएका थिए ।
जिबी राईका पार्टनर बराललाई बुटवलको सुप्रिम सहकारीको ठगीमा पनि प्रतिवादी बनाइएको छ । उनीविरुद्ध भने सम्पत्ति शुद्धीकरणको कसुरमा पनि अनुसन्धान भएको छैन ।
एमाले नेता केबी उप्रेतीविरुद्ध प्रहरीमा थप जाहेरी, तर भएन सम्पत्ति शुद्धीकरण र संगठित अपराधमा अनुसन्धान 
आइडियल यमुना हाम्रो बहुउद्देश्यीय सहकारी संस्थाको दुई अर्ब हिनामिनाका आरोपित एमाले नेता केबी उप्रेतीविरुद्ध ठगीका थप जाहेरी परेका छन् । तर, प्रहरीले भने उनीमाथि सामान्य सहकारी ठगीको कसुरमा मात्र अनुसन्धान गरेको छ ।
हाल डिल्लीबजार कारागारमा रहेका उप्रेती नेतृत्वको समूहले उक्त सहकारी संस्थाको दुई अर्ब हिनामिना गरेको थियो । जसमा थप जाहेरीका आधारमा जिल्ला प्रहरी परिसर, काठमाडौंले थप तीनवटा पूरक अभियोग दर्ता गरेको छ । पाँच करोड ७७ लाख, १८ करोड ४५ लाख र अर्काेमा ४१ लाख ४६ हजार बिगो कायम गरी तीनवटा छुट्टाछुट्टै पूरक अभियोग दर्ता गरिएको छ । उप्रेतीको समूहले विभिन्न सहकारी मर्ज गरी सहकारीको पैसा विभिन्न कम्पनी र जग्गामा लगानी गरेको थियो ।
तर, सहकारीको दुई अर्बभन्दा धेरै कुन–कुन कम्पनीमा लगानी गरियो भनेर प्रहरीले खोजी गरेको छैन । पक्राउ पर्दा उनी राष्ट्रिय सहकारी बैंकको समेत अध्यक्ष थिए । एमालेकै आडमा उनले सो पद पाएका थिए । पक्राउ परेपछि एमालेले उनलाई सहकारी विभागको सचिवबाट निलम्बन गरेको थियो । रवि लामिछाने जोडिएबाहेकका सहकारीको अपचलनमा प्रहरीले संगठित अपराध र सम्पत्ति शुद्धीकरणको कसुरतर्फ अनुसन्धान नगरेपछि अनुसन्धानमा प्रतिशोधको आरोप लाग्दै आएको छ ।
source naya patrika
