नेपाल राष्ट्र बैंकले तरलता बढेसँगै आज २० अर्ब बराबरको निक्षेप संकलन बोलकबोल गर्ने भएको छ । यो बोलकबोल २८ दिनको अवधिका लागि सञ्चालन हुनेछ ।
बोलकबोल आज दिउँसो ३ अनलाइन बिडिङ सिस्टम सफ्टवेरमार्फत मात्र हुने राष्ट्र बैंकले जानकारी दिएको छ । निक्षेपको व्याजदर बोलकबोलकै माध्यमबाट निर्धारण हुनेछ भने भुक्तानी मिति २०८२ चैत २९ गते तय गरिएको छ ।
बोलकबोलमा क, ख र ग वर्गका बैंक तथा वित्तीय संस्थाहरू मात्र सहभागी हुन पाउने र संकलित रकम सम्बन्धित बैंकको खाता मार्फत जम्मा गरिनेछ र व्याजसहित भुक्तानी मितिमा फिर्ता गरिने राष्ट्र बैंकले जनाएको छ ।
बैंक तथा वित्तीय संस्थाले न्यूनतम १० करोड रुपैयाँदेखि माथि ५ करोड रुपैयाँका दरले भाग जाने गरी कुल आह्वान रकमसम्म बोलकबोल गर्न सक्ने र निक्षेप संकलनको बोलकबोल ब्याजदरमा गर्नुपर्नेछ भने बहुब्याजदरमा पनि बहुबोलकबोल गर्न सकिने व्यवस्था रहेको राष्ट्र बैंकले जनाएको छ ।
राष्ट्र बैंकका अनुसार भुक्तानी मितिमा निर्धारित ब्याजसहित संकलित रकम सम्बन्धित बैंकको राष्ट्र बैंकस्थित खातामा जम्मा गरिनेछ । संकलित निक्षेप रकमलाई अनिवार्य नगद मौज्दातमा गणना गर्न नपाइने तर राष्ट्र बैंकको निर्देशनअनुसार कायम राख्नुपर्ने एसएलआर तथा तरलता अनुपातमा भने गणना गर्न पाइनेछ । साथै, भुक्तानी मिति अघि उक्त निक्षेप रकम फिर्ता वा समयअगावै भुक्तानी नहुने राष्ट्र बैंकले स्पष्ट गरेको छ ।
निक्षेप संकलन सम्बन्धी थप जानकारीका लागि मौद्रिक व्यवस्थापन विभागमा सम्पर्क गर्न सकिने बैंकले जनाएको छ।
