दीपेन्द्र प्रजापति/कालो झोला ।
बीरगंज, १३ असोज । सशस्त्र प्रहरी बल नेपाल नं. १३ गण मुख्यालय, पर्सा ले आज साँझ पर्सा जिल्लाको छिपहरमाई गाउँपालिका वडा नं. ०४, बन्जारी स्थित भिस्वा-जानकी टोला सडक खण्ड बाट ठूलो परिमाणमा प्रतिबन्धित लागु औषध चरेश बरामद गरेको छ ।
सोमबार साँझ त्यहाँ बाट सशस्त्र प्रहरी सहायक निरीक्षक नितेश कुमार साह कानुको कमाण्डमा खटिएको ७ जनाको टोलीले उल्लेखित सडक खण्डमा चेक जाँच गर्ने क्रममा BR 22 J 3550 नम्बरको होण्डा साइन मोटरसाइकल मा फल्स बटम बनाई लुकाइ छिपाइ भारत तर्फ लैजाँदै गरेको ९ किलो ५ सय २२ ग्राम चरेश बरामद गरेको छ ।
बरामद गरिएको चरेश १९ वटा प्लास्टिकका प्याकेटमा राखिएको अवस्थामा फेला परेको हो । घटनामा संलग्न भारतको बिहार राज्य, पश्चिम चम्पारण जिल्ला, बेतिया कोईरी टोला वार्ड नं. ३७ का ३१ वर्षीय गुलाम मोहमदलाई समेत पक्राउ गरि आवश्यक कानुनी कारबाहीका लागि स्थानीय प्रहरीलाई बुझाइएको छ ।
साथै निजको साथबाट आधार कार्ड र कार्बोन कम्पनीको कीप्याड मोबाईलसमेत बरामद गरिएको कुरा सूचना अधिकारी सशस्त्र प्रहरी नायब उपरीक्षक सुरज कार्की ले बताएका छन् ।
