काठमाडौँ । भारतीय प्रधानमन्त्री नरेन्द्र मोदी चीन भ्रमणमा रहेका बेला राष्ट्रपति सी जीङपीङसँग दुइपक्षीयभेटवार्ता गरेका छन् ।
चीनको तियानजिनमा आयोजित सांघाई सहयोग संगठन शिखर सम्मेलनमा भागलिने क्रममा चीन पुगेका मोदीले राष्ट्रपति सीसँग गरेको भेटवार्ता र छलफल भएका विषय बारे विदेश सचिव विक्रम मिश्रीले जानकारी दिएका छन् । मिश्रीले भारत र चीन बीच छिटै सिधा उडान हुने बताउदै चाँडै नै भारत र चीन बीच सिधा उडानहरू फेरि सुरु भएको देख्ने बताए ।
मिश्रीले विगत केही हप्ता र महिनादेखि दुवै देशले यस विषयमा गहन छलफल गरिरहेको र आगामी केहि हप्तामै सिधा उडान शुरु हुने बताए ।
त्यस्तै भारत र चीनबीच सीमा वार्ताको बारेमा पनि छलफल भएको छ । मिश्रीले भने- ‘यो कुराकानी अगाडि बढाउन समर्पित संयन्त्रहरू सिर्जना गरिएको छ । हामी आशा गर्छौं, भारत र चीन बीचको सीमा क्षेत्रमा सहयोग र समन्वयको लागि अवस्थित संयन्त्र आगामी दिन र हप्ताहरूमा भेट्नेछ । दुवै पक्षका नेताहरूले सीमा सीमाङ्कनसँग सम्बन्धित वार्तालाई कसरी अगाडि बढाउने भनेर आपसमा निर्णय गर्नेछन् ।’
प्रधानमन्त्री नरेन्द्र मोदी र चिनियाँ राष्ट्रपति सी जिनपिङले अन्तर्राष्ट्रिय आर्थिक अवस्थाको बारेमा छलफल गरेको मिश्रीले बताए । उनीहरूले वर्तमान परिस्थितिले विशेष गरि अमेरिकी करले धेरै चुनौती ल्याएको विषयमा छलफल गरेका थिए । यद्यपि, छलफलको मुख्य केन्द्रबिन्दु द्विपक्षीय सम्बन्ध रहेको मिश्रीले बताए । दुवै नेताहरूले अन्तर्राष्ट्रिय स्तरमा के भइरहेको छ र यसबाट उत्पन्न हुने चुनौतीहरूलाई पनि स्वीकार गरे, तर उनीहरूले यी परिस्थितिहरूलाई पारस्परिक समझदारी बढाउन र भारत-चीन व्यापारिक सम्बन्धलाई अगाडि बढाउन कसरी प्रयोग गर्न सकिन्छ भनेर हेर्ने प्रयास गरेको मिश्रीले बताए ।
२०२० मा गलवान उपत्यकामा भारत-चीन सैन्य झडप पछि यो मोदीको पहिलो चीन भ्रमण हो । अर्कोतर्फ अमेरिकाले कर लगाएपछि सम्बन्ध चिसिएको समयमा मोदीको चीन भ्रमणले विश्वको ध्यान केन्द्रित गरेको छ । मोदीले यसअघि २०१८ मा चीनको भ्रमण गरेका थिए । यो उनको चीनको छैटौं भ्रमण हो ।
