दीपेन्द्र प्रजापति/कालो झोला ।
वीरगन्ज, २६ असार । वीरगन्ज महानगरपालिकाका कार्यवाहक नगर प्रमुख इम्तियाज आलमले जिम्मेवारी पाएलगत्तै महानगरको प्रशासनिक सुधार र सेवाप्रवाहलाई चुस्त बनाउन तीव्र सक्रियता देखाउनुभएको छ।
सेवाग्राहीको गुनासोलाई तत्कालै सम्बोधन गर्ने र कार्यालयभित्रको ढिलासुस्ती अन्त्य गर्ने दृढ संकल्पका साथ कार्यवाहक प्रमुख आलम र प्रमुख प्रशासकीय अधिकृत वसन्त बहादुर बोहराले शुक्रबार संयुक्त रूपमा महानगरका विभिन्न फाँटहरूको आकस्मिक (छड्के) अनुगमन गर्नुभएको हो ।
नेतृत्व तह आफैं अग्रसर भएर कार्यालय समयको सुरुवातमै फाँट–फाँटमा पुगेपछि महानगरका कर्मचारी वृत्तमा तरङ्ग पैदा भएको छ भने वीरगन्जबासीले यो कदमको उच्च प्रशंसा गरेका छन् ।
शुक्रबार बिहान ठीक १०:३० बजे कार्यवाहक नगर प्रमुख आलम र प्रमुख प्रशासकीय अधिकृत बोहराले महानगरका सम्पूर्ण शाखाहरूमा पुगेर कर्मचारीहरूको उपस्थितिको अवस्था नियाल्नु भएको थियो । सो आकस्मिक अनुगमनका क्रममा विभिन्न शाखा र फाँटहरूमा कार्यरत करिब २० जना कर्मचारीहरू आफ्नो कार्यकक्षमा अनुपस्थित भेटिएका थिए ।
अनुगमनपछि प्रतिक्रिया दिँदै महानगरका प्रमुख प्रशासकीय अधिकृत वसन्त बहादुर बोहराले प्रशासनिक अनुशासनमा कुनै पनि सम्झौता नहुने स्पष्ट पार्नु भयो । उहाँले भन्नु भयो, “अनुगमनका क्रममा कार्यकक्षमा नदेखिएका कर्मचारीहरू मध्ये कतिपय बिदामा रहेको, कतिपय फिल्डमा गएको र केही ढिला आएको पाइएको छ ।
हामी उनीहरूले बुझाउने विवरणको विस्तृत प्रमाणीकरण (भेरिफिकेसन) गर्छौँ । यदि कसैको लापरबाही वा गल्ती भेटिएमा नियमानुसार कडा कारबाही प्रक्रिया अगाडि बढाउनेछौँ ।” कार्यालय प्रमुख आफैं उपस्थित भई यसरी नियमन गर्नुले महानगरको सुशासनप्रतिको प्रतिबद्धता स्पष्ट झल्किन्छ ।
कार्यवाहक नगर प्रमुख इम्तियाज आलमले यो छड्के अनुगमन केवल कारबाहीका लागि मात्र नभई सेवाग्राहीको मर्का बुझ्न र कर्मचारीहरूको कार्यवातावरण सुधार्न गरिएको बताउनु भयो । उहाँले भन्नुभयो, “महानगरमा आउने विभिन्न सेवाग्राहीहरूले गर्नुभएको गुनासोलाई हामीले गम्भीरतापूर्वक लिएका छौँ ।
त्यसका साथै, पछिलो जेन्जी (Gen-Z) आन्दोलन पश्चात् परिवर्तन भएको परिवेशमा महानगरले दिँदै आएको सेवा प्रवाह र कार्यालय व्यवस्थापनमा कर्मचारीहरूलाई के–कस्ता व्यवहारिक अप्ठ्याराहरू परिरहेका छन्, सो समेत प्रत्यक्ष बुझन हामीले यो अनुगमन गरेका हौँ ।
“कार्यवाहक प्रमुखको जिम्मेवारी सम्हालेलगत्तै आलमले देखाउनुभएको यो तत्परता र प्रमुख प्रशासकीय अधिकृत बोहराको प्रशासनिक कडापनले वीरगन्ज महानगरपालिका जनउत्तरदायी बन्दै गएको बलियो सन्देश दिएको छ ।
नेतृत्वको यस्तो प्रशंसनीय कदमले आगामी दिनमा महानगरको सेवा प्रवाह थप पारदर्शी, छिटो–छरितो र मर्यादित बन्ने विश्वास सर्वसाधारणले लिएका छन् ।
