सनराइजर्स हैदराबादका विस्फोटक ओपनर अभिषेक शर्मामाथि अनुशासन उल्लंघनको आरोपमा जरिवाना गरिएको छ ।
जारी आइपिएल अन्तर्गतको गएराती सम्पन्न कोलकाता नाइट राइडर्सविरुद्धको खेलपछि अभिषेकलाई म्याच शुल्कको २५ प्रतिशत जरिवाना गरिएको छ भने उनको खातामा एक डिमेरिट अंक पनि थपिएको छ ।
अभिषेकले खेलका क्रममा आउट भएपछि अपशब्द प्रयोग गर्नुका साथै अम्पायरको निर्णयप्रति असहमति जनाएकाले कारबाही गरिएको हो । उनलाई आचारसंहिताको धारा २.३ अन्तर्गत स्तर- १ को उल्लंघनमा दोषी ठहर गरिएको छ ।
अभिषेकले आफूले गरेको गल्ती स्वीकार गर्दै म्याच रेफ्रीको निर्णय मानेकाले यस विषयमा थप सुनुवाई नहुने आइपिएल काउन्सिलले जनाएको छ ।
घटनाको विस्तृत विवरण सार्वजनिक नगरिए पनि फिल्डिङका क्रममा क्याच आउट भएपछि असन्तुष्टि जनाउँदै उनले अपशब्द प्रयोग गरेको बताइएको छ ।
यसअघि राम्रो प्रदर्शन गर्न नसकेका अभिषेकले उक्त खेलमा भने उत्कृष्ट ब्याटिङ गर्दै २१ बलमा चार चौका र चार छक्काको मद्दतमा ४८ रन बनाएका थिए । उनी सनराइजर्सका लागि सयभन्दा बढी छक्का प्रहार गर्ने दोस्रो खेलाडीसमेत बनेका थिएय् ।
सनराइजर्स हैदराबादले उक्त खेल जित्दै प्रतियोगितामा आफ्नो पहिलो जित दर्ता गरेको छ ।
