स्याङ्जा, कञ्चनपुर र कैलालीमा प्रहरीले विभिन्न अवैध लागूऔषधसहित ६ जनालाई पक्राउ गरेको छ ।
स्याङ्जा जिल्ला, अर्जुनचौपारी गाउँपालिका–१ जिरोबाट नियन्त्रित लागूऔषध डाईजेपाम ५ एम्पुल, फेनारगन ५ एम्पुल र बुप्रेनोर्फिन ५ एम्पुलसहित २७ वर्षीय अनिस थापा र एक जनालाई प्रहरीले पक्राउ गरेको छ। जिल्ला प्रहरी कार्यालय स्याङ्जाबाट खटिएको टोलीले ना.२२ प ८२५९ नम्बरको मोटरसाइकलमा सवार उनीहरूलाई लागूऔषधसहित नियन्त्रणमा लिएको हो ।
त्यसैगरी, कञ्चनपुर, बेलौरी नगरपालिका–८ स्थित कलकत्ता बजारबाट अवैध लागूऔषध खैरो हेरोइनजस्तो देखिने १ ग्राम ३३० मिलिग्रामसहित २० वर्षीय दिपेश रानालाई प्रहरीले पक्राउ गरेको छ। प्रहरी चौकी पचुइबाट खटिएको टोलीले भारतबाट नेपालतर्फ साइकलमा आउँदै गरेका उनलाई उक्त पदार्थसहित नियन्त्रणमा लिएको हो।
त्यस्तै कैलाली, धनगढी उपमहानगरपालिका–२ बैजनाथ टोलबाट पनि अवैध लागूऔषध खैरो हेरोइनजस्तो देखिने ५० मिलिग्रामसहित २९ वर्षीय कनैया चौधरी र अन्य २ जनालाई प्रहरीले पक्राउ गरेको छ। जिल्ला प्रहरी कार्यालय कैलालीबाट खटिएको टोलीले उनीहरूलाई लागूऔषधसहित नियन्त्रणमा लिएको हो।
यस सम्बन्धमा प्रहरीले आवश्यक अनुसन्धान जारी राखेको जनाएको छ।
