भारतीय क्रिकेट टोलीका पूर्व स्टार ओपनर शिखर धवन आफ्नो जीवनको नयाँ चरण सुरु गर्न लागेका छन् ।
मिडिया रिपोर्टका अनुसार, शिखर धवनले फेब्रुअरीमा आफ्नी प्रेमिका सोफी शाइनसँग विवाह गर्न लागेका हुन् । विवाह फेब्रुअरीको तेस्रो हप्तामा दिल्ली-एनसीआरमा हुने बताइएको छ । हिन्दुस्तान टाइम्सको रिपोर्ट अनुसार, विवाहको तयारी तीव्र गतिमा भइरहेको छ ।
सोफी शाइन एक आयरिश नागरिक हुन् र हाल शिखर धवन फाउन्डेसनमा काम गर्छिन । यो फाउन्डेसन शिखर धवनको खेलकुद तथा सामाजिक भेन्चर्स समूहको परोपकारी शाखा हो । सोफीलाई सामाजिक कार्यमा गहिरो रुचि छ र केही समयदेखि धवनको व्यावसायिक र व्यक्तिगत यात्राको अभिन्न अंग रहिआएको छ ।
रिपोर्टका अनुसार, शिखर धवन र सोफी शाइनको केही वर्षअघि दुबईमा भेट भएको थियो । सुरु भएको मित्रता बिस्तारै प्रेममा परिणत भयो । यी दुई विगत एक वर्षदेखि सँगै बस्दै आएका छन् र आफ्नो भविष्यको बारेमा गम्भीर छन् । सोफीलाई आईपीएल २०२४ को खेलहरूमा पनि शिखरसँग देखिएको थियो ।
आईसीसी च्याम्पियन्स ट्रफी २०२५ को समयमा शिखर धवनलाई सोफी शाइनसँग स्ट्यान्डमा देख्दा यो सम्बन्ध पहिलो पटक चर्चामा आएको थियो । पछिल्ला समयमा सामाजिक सञ्जालमा दुईका तस्बिर र भिडियो आइरहेका छन् ।
हालैको सार्वजनिक सम्मेलनको क्रममा, शिखर धवनले नाम नलिई आफु सम्बन्धमा रहेको र नयाँ जीवन शुरु गर्न लागेको बताएका थिए ।
शिखर धवनको पहिले अष्ट्रेलियामा बस्ने आयशा मुखर्जीसँग विवाह भएको थियो । यस सम्बन्धबाट उनीहरूको ११ वर्षीय छोरा जोरावर धवन छन् । सम्बन्ध विच्छेद पछि, शिखर लामो समयसम्म आफ्नो व्यक्तिगत जीवनको बारेमा मौन रहेका थिए । धवनले आयशाले उनलाई आफ्नो छोरा जोरावरलाई भेट्न नदिएको आरोप लगाएका थिए ।
