दीपेन्द्र प्रजापति/कालो झोला ।
बीरगंज, १७ फागुन । भारत सरकार बाट नेपाललाई निर्वाचन सम्बन्धी सहायताको चौथो किस्ता आईतबार को दिन बीरगंजमा आयोजित एक कार्यक्रममा महावाणिज्य दूत देवी सहाय मीनाले पर्साका प्रमुख जिल्ला अधिकारी भोला दाहाललाई औपचारिक रूपमा हस्तान्तरण गर्नु भएको छ ।
नेपालमा आगामी चुनावको तयारीका लागि नेपाल सरकार द्वारा निवेदन गरिए अनुसार, नेपाल सरकारलाई उपहार स्वरूप दिइएको सहयोगको चौथो किस्तामा ३० वटा वन टन ट्रक र अन्य सामग्रीहरू समावेश रहेका छन् ।
आफ्नो मन्तव्यमा, प्रमुख जिल्ला अधिकारी श्री भोला दाहालज्यूले नेपाललाई समयमै निर्वाचन सम्बन्धी सहायता प्रदान गरेकोमा भारत सरकारलाई धन्यवाद दिनु भएको छ ।
भारत सरकार बाट ५ सय ८० भन्दा बढी सवारी साधन र अन्य सामग्रीहरू निर्वाचन सम्बन्धी सहायताको पहिलो तीन किस्ताहरू पहिले नै नेपाललाई हस्तान्तरण भइसकेका छन् ।
भारतीय पक्ष बाट जारी सहयोग र समर्थनले दुवै देशहरू बीच रहेको बहुआयामिक र बहुक्षेत्रीय विकास साझेदारीलाई प्रतिबिम्बित गरेको छ ।
यो भारत र नेपालको जनता बीचको गहिरो पारस्परिक विश्वास र मित्रताको पनि प्रतीक मानिन्छ ।
