दीपेन्द्र प्रजापति/कालो झोला ।
वीरगंज, २७ कार्तिक । वीरगंज महानगरपालिकालाई यहाँ स्थित भास्कर हर्वास्युटिकल्स उद्योगले पाँच थान ल्यापटप सहयोग गरेको छ ।
गएको भदौ २३ र २४ गते ‘जेन्जी’का नाममा भएको आन्दोलनका क्रममा लुटपाट, तोडफोड र आगजनीका कारण महानगरपालिकाको भवन र कार्यालय सामग्रीहरू पूर्ण रूपमा नष्ट भएका थिए । त्यस घटनापछि कार्यालय सञ्चालन र प्रशासनिक कामहरू सहज बनाउन कठिनाइ परेको थियो ।
उक्त अवस्थालाई मध्यनजर गर्दै भास्कर हर्वास्युटिकल्स प्रा.लि.ले सामाजिक उत्तरदायित्व (CSR) अन्तर्गत महानगरलाई सहयोग स्वरूप ल्यापटप उपलब्ध गराएको हो ।
बिहीबार महानगरपालिकामा आयोजित कार्यक्रममा उद्योगका प्रतिनिधि शम्भु अग्रवालले पाँच थान ल्यापटप महानगरका प्रमुख राजेशमान सिंहलाई हस्तान्तरण गर्नुभयो । अग्रवालले समाज र स्थानीय निकायसँगको सहकार्यलाई प्राथमिकता दिने कम्पनीको नीति अन्तर्गत यो सहयोग गरिएको बताउनुभयो । उहाँका भन्नुभयो, ‘वीरगंज हाम्रो कार्यस्थल मात्र होइन, हाम्रो समुदाय हो । त्यस समुदायको पुनःस्थापनामा योगदान दिन पाउनु हाम्रो दायित्व हो ।
’कार्यक्रममा वीरगंज महानगर प्रमुख सिंहले भास्कर हर्वास्युटिकल्स प्रति आभार व्यक्त गर्नुभयो । उहाँले भन्नुभयो, ‘भदौको घटनापछि महानगरको भौतिक पूर्वाधार र उपकरण नष्ट हुँदा सेवा प्रवाहमा चुनौती आएको थियो । यस्ता सहयोगहरूले महानगरलाई पुनःस्थापनामा ठूलो सहयोग पु–याइरहेका छन् । हामी सबै दातृ संस्था र उद्योगसँग सहकार्यमा अघि बढ्नेछौं ।
’यसअघि पनि सूर्य नेपाल प्रा.लि., वीरगंज उद्योग वाणिज्य संघ, एन.पी.एल. समाज कल्याण संस्था, औषधी व्यवसायी संघ, के.एन.पी. जापान र बृटानियाजस्ता संस्थाहरूले ल्यापटप, कम्प्युटर, प्रिन्टर, टेबल–कुर्सी लगायतका सामग्री सहयोग गरिसकेका छन् ।
महानगरले यस्ता सहकार्य र सहयोगका कार्यक्रमहरूबाट पालिकाबाट प्रदान गरिने सेवाको पुनःस्थापना तथा डिजिटल प्रशासन प्रणालीलाई सुदृढ बनाउने लक्ष्य लिएको जनाएको छ ।
