काठमाडौँ । जापानी प्रधानमन्त्री इशिबा शिगेरुले राजीनामा दिएका छन् । आइतबार पत्रकार सम्मेलन गरेर इशिवाले राजीनामा घोषणा गरेको जापानी मिडिया एनएचकेले उल्लेख गरेको छ ।
इशिबाले शनिबार पूर्व प्रधानमन्त्री सुगा योशिहिदे र कृषिमन्त्री कोइजुमी शिन्जिरोलाई भेटेपछि राजीनामाको निर्णयमा पुगेको बताइएको छ । दुवैले पदभन्दा पार्टी भित्र एकता महत्वपूर्ण भएको भन्दै उनलाई राजीनामा गर्न सुझाव दिएको बताइएको छ ।
आफ्नो सत्तारुढ लिबरल डेमोक्रेटिक पार्टी भित्रको भ्रमलाई नियन्त्रण गर्ने प्रयास गर्न उनले यो निर्णय गरेको विश्वास गरिन्छ। इशिबाले गत अक्टोबरमा पदभार ग्रहण गरे र मुद्रास्फीतिलाई सम्बोधन गर्ने र पार्टीलाई सुधार गर्ने वाचा गरेका थिए ।
उनको गठबन्धन सरकारले जुलाईमा भएको माथिल्लो सदन (हाउस अफ काउन्सिलर) को चुनाव हारेको थियो । इशिबाले हालै यसको लागि माफी मागेका छन् र राजीनामा दिने निर्णय गर्ने बताएका छन् ।
इशिबाको नेतृत्वमा रहेको एलडिपी-कोमेइटो गठबन्धनले जुलाई २०२५ मा भएको चुनावमा लज्जास्पद हार बेहोर्नुपरेको थियो । गठबन्धनले ५० सिटको लक्ष्य राखेको थियो, तर ४७ सिट मात्र जित्न सकेको थियो, जसका कारण उनको सरकारले दुवै सदनमा बहुमत गुमाएको थियो । यो जापानी राजनीतिमा ऐतिहासिक धक्का थियो ।
चुनावी हारपछि, एलडीपी भित्र इशिबा हटाउने अभियान चलेको थियो । केही पार्टी नेता र सांसदहरूले उनको नेतृत्वमाथि प्रश्न उठाउदै उनलाई हटाउने अभियान चलाएका थिए, जसले उनको स्थिति कमजोर बनायो । इशिबाले पार्टीमा एकता कायम राख्न राजीनामा दिने निर्णय गरेको मिडिया रिपोर्टमा उल्लेख छ ।
इशिबाले हालै अमेरिकासँग व्यापार सम्झौता गरेका छन् जसले जापानी अटोमोबाइलमा लाग्ने कर २५ प्रतिशतबाट घटाएर १५ प्रतिशत बनाएको छ । यो सम्झौतालाई लगानीकर्ताहरूले स्वागत गरेका थिए , तर यसले उनलाई आफ्नो पद जोगाउन भने सकेन ।
