दीपेन्द्र प्रजापति/कालो झोला ।
वीरगञ्ज, १३ चैत । हरेक वर्ष झैं यस वर्ष पनि वीरगञ्ज स्थित नेशनल मेडिकल कलेजले ईदको अवसरमा आज पर्सा र बाराका विभिन्न एतिमखाना (अनाथालय) र मदरसामा अध्ययनरत गरिब तथा अनाथ छात्रछात्राहरुलाई नयाँ कपडा वितरण गरेको छ ।
रमजान महिनाको अन्त्यमा मनाइने ईद उल-फित्र पर्वमा नयाँ कपडा लगाउने चलन रहेकाले आर्थिक रूपमा कमजोर बालबालिकाले पनि यो पर्व हर्षोल्लासका साथ मनाउन सकून् भन्ने उद्देश्यले कलेजले यस्तो सामाजिक पहल गर्दै आएको छ ।
कलेजका प्रबन्ध निर्देशक शाहनवाज अंसारीका अनुसार, “ईदको दिन कोही पनि दुःखी नहोस् भन्ने सोचका साथ हामीले गरिब तथा अनाथ बालबालिकालाई नयाँ कपडा वितरण गर्दै आएका छौं । यसले उनीहरूको अनुहारमा खुसी ल्याउने हाम्रो प्रयास हो ।”
यस पटक पर्सा र बाराका ९ वटा एतिमखाना तथा मदरसाका करिब ५ सय जना छात्रछात्रा लाई पुग्ने गरी कुर्ता–पाइजामा को कपडा वितरण गरिएको कलेजका एडमिसन तथा मार्केटिङ डाइरेक्टर अबिद हुसैन अंसारीले जानकारी दिए ।
यस सामाजिक कार्यले आर्थिक रूपमा विपन्न बालबालिकालाई पनि पर्वको उमंग महसुस गराउने मात्र नभई, समुदायमा सहयोग र सद्भावको भावना बढाउन महत्वपूर्ण योगदान दिने विश्वास लिइएको छ ।
%20को%20उद्घाटन-){kind=link}