काठमाडौँ । महोत्तरीको सोनमा गाउँपालिकाका प्रमुख प्रशासकीय अधिकृत श्रीदेव यादव घुससहित पक्राउ परेका छन् ।
अख्तियार दुरुपयोग अनुसन्धान आयोगको कार्यालय बर्दिवासका अनुसार सडक ढलान योजनाको काम सम्पन्न भएपछि भुक्तानी गर्ने क्रममा विभिन्न बहाना बनाएर सेवाग्राहीलाई दुःख हैरानी दिँदै घुस मागिएको भन्ने सूचना र उजुरीका आधारमा टोली खटिएको थियो ।
टोलीले यादवलाई सेवाग्राहीबाट ७२ हजार रुपैयाँ घुस लिइसकेको अवस्थामा नियन्त्रणमा लिएको जनाएको छ । पक्राउका क्रममा स्रोत नखुलेको ८३ हजार १४५ रुपैयाँ पनि बरामद गरिएको छ ।
यस्तै, उनीसँग रहेको एउटा ल्यापटप, दुई वटा मोबाइल र अन्य सरकारी कागजातसमेत नियन्त्रणमा लिइएको अख्तियारले जनाएको छ । यादवलाई महोत्तरीको गौशाला नगरपालिका–५ निगौलस्थित सम्सी–गौशाला सडकखण्डमा गौशालतर्फ जाँदै गरेको सरकारी नम्बर प्लेटको सवारीसाधनबाट शुक्रबार नियन्त्रणमा लिइएको हो । घटनाबारे थप अनुसन्धान भइरहेको अख्तियारले जनाएको छ ।
