दीपेन्द्र प्रजापति/कालो झोला ।
बीरगंज, ०३ मंसिर । वडा प्रहरी कार्यालय, श्रीपुर ले विशेष सूचनाको आधारमा कार्तिक ३० गते दिउँसो करिब ०२:३० बजेको समयमा लाखौं मूल्य बराबरको सुन-चाँदीको गहना सहित ३ भारतिय र १ जना नेपाली नागरिकलाई आफ्नो नियन्त्रणमा लिएको छ ।
उक्त दिन त्यहाँ बाट खटिएको टोलीले वीरगञ्ज महानगरपालिका वडा नं. ३२ स्थित जितपुर बाट मिलनचोक तर्फ जाँदै गरेको भारतको विहार राज्य जिल्ला वेतीया थाना बल्थर सरकिला बस्ने वर्ष ३३ को विजय रायले चलाइ ल्याएको लु. ९६ प ३७३३ नम्बरको स्कुटीलाई रोकी चेक जाँच गर्दा सो स्कुटीको पछाडि सीटमा सवार सोही स्थान बस्ने वर्ष ६० शेख बुनादले लगाएको पाइन्टको दाँहिने खल्ती बाट सेतो रंगको रूमालमा सेतो रंगको कागज भित्र बिल बिजक नरहेको सुन जस्तो धातुले बनेको गरगहनाहरू र चाँदी जस्तो देखिने धातुले बनेका गरगहनाहरू सहित नियन्त्रणमा लिइएको छ ।
यसै क्रममा निज संग प्रारम्भिक अनुसन्धान गर्दा अन्य थप गहनाहरू वीरगञ्ज महानगरपालिका वडा न. ३२, टेढा मुसहरटोल बस्ने वर्ष २० को विध्या कुमार नटको घर स्थानीय भद्र भलादमी तथा जनप्रतिनिधिहरूको रोहबरमा घर खानतलासी गर्दा निजको घरमा लुकाइ छिपाई राखिएको अन्य थप गरगहनाहरू गरी जम्मा अंदाजी मूल्य रू. ३६ लाख ७० हजार ५१ बराबरका फेला परेकोले उल्लेखित परिमाणका गरगहनाहरू तथा नगद र उक्त गैर कानूनी कार्यमा संलग्न भारत कै विहार राज्यको जिल्ला वेतीया गबनाहा थाना आरा पिपरा बस्ने वर्ष ३१ को बिनोद राउत सहित ४ जना व्यक्तिहरूलाई नियन्त्रणमा लिई निजहरू विरुद्ध चोरी तथा डाँका सम्बन्धि कसूरमा पर्सा जिल्ला अदालत बाट ०५ दिनक म्याद थप अनुमति लिइ अनुसन्धान कार्य भइरहेको कुरा बुधबार आयोजित पत्रकार सम्मेलनमा जिल्ला प्रहरी कार्यालय, पर्सा का प्रमुख प्रहरी उपरीक्षक सुदिप राज पाठक ले बताएका छन् ।
साथै निजहरु बाट क्रमशः चाँदीका बाला-४ थान, सुनको सिक्री-११ थान, चाँदीका पाउजो-१० थान, सुनको झुम्का-२ थान, चाँदीका सिक्का-२ थान, सुनको नथिया-३ थान, चाँदीका बिछिया-८ थान, सुनको पोतो सहित जडान माला-२ थान, चाँदीका हथशंकर-२ थान, सुनको M लेखेको लकेट-१ थान, सुन-चाँदी तौल गर्ने तराजु-१ थान र ढक्कहरू, सुनको औठी-१ थान, नगद-नेपाली रू. ३ लाख ७९ हजार र भारतीय नगद रु. ९ हजार २ सय तथा सुनको मॉगटिका-२ थान बरामद गरिएको छ ।
