दीपेन्द्र प्रजापति/कालो झोला ।
वीरगंज, २० भदौ । शौचालयको फोहोर सोझै नालामा खसाउने वीरगंजको आदर्शनगर स्थित होटल कन्ट्री इनलाई वीरगंज महानगरपालिकाले रु. २५ हजार रुपैयाँ जरिबाना गरेको छ ।
होटल एशोसियशन पर्साका अध्यक्ष समेत रहेका हरि पन्त द्वारा संचालित होटल कन्ट्रि इनले शौचालयको दुर्गन्धित फोहोर सोझै नालामा खसाएको भेटेपछि जरिबाना गरिएको महानगरका सरसफाई शाखा प्रमुख सर्फुद्दिन मियाँले जानकारी दिए ।
राष्ट्रिय स्वतन्त्र पार्टीका पर्सा इन्चार्ज समेत रहेका पन्तद्वारा संचालित होटलले सरसफाईमा लापरवाही गरेको भेटिएपछि कारबाही स्वरुप जरिबाना गरिएको मियाँले बताए ।
वीरगंज महानगरपालिकाले नगर सफाईमा कडाई गर्दै आएको छ । जथाभावी फोहोर फाल्ने संघ संस्था तथा व्यक्तिलाई जरिवाना गर्दै आएको महानगरले फोहोर संकलनका लागि दैनिक तीन पटक टोलटोलमा ट्याक्टरसहित सफाइकर्मी परिचालन गर्ने गरेको छ । तर यो सबैमा मात्र पुरानो वडाहरु नै पर्छ, नयाँ वडाहरुमा त हप्तौं सरसफाई हुँदैन ।
सरसफाईमा शुन्य सहनशीलता अपनाएको महानगरले जथाभावी फोहोर फाल्ने जो कोहीलाई पनि जरिबाना गरेर सचेत गराउँदै आएको छ ।
