दीपेन्द्र प्रजापति/कालो झोला ।
वीरगञ्ज, ०४ असार | भारतको महावाणिज्य दूतावास, वीरगञ्ज द्वारा पोखरिया नगरपालिका र रानीगंज आयुर्वेद अस्पतालको सहकार्यमा श्री जिल्ला उच्चाङ्गल रामदेव कलवार माध्यमिक विद्यालय, पोखरिया, पर्सामा “स्वस्थ वृद्धावस्थाका लागि योग” विषय अन्तर्गत १२ औं अन्तर्राष्ट्रिय योग दिवस समारोहको आयोजना गरिएको छ ।
यो कार्यक्रम १२ औं अन्तर्राष्ट्रिय योग दिवस समारोहको क्रममा महावाणिज्य दूतावास द्वारा आयोजित गरिँदै आएको शृङ्खलाको चौथो कार्यक्रम थियो । विद्यार्थीहरू सहित ३ सय ५० भन्दा बढी योग उत्साही सहभागीहरूले यस कार्यक्रममा भाग लिए र स्वास्थ्य, सद्भाव एवं समग्र कल्याणको योगको शाश्वत सन्देशलाई उजागर गरेका छन् ।
यस आयोजनाको विशेष उद्देश्य विद्यार्थीहरूलाई सानै उमेरमा समग्र विकासका लागि योगका उत्कृष्ट लाभहरू बारे अवगत गराउनु थियो ।
उक्त कार्यक्रममा प्रमुख अतिथिको रुपमा मधेश प्रदेश सरकारका भूमि व्यवस्थापन, कृषि तथा सहकारी मन्त्री माननीय श्याम प्रसाद पटेल पनि उपस्थित हुनु हुन्थ्यो । पोखरिया नगरपालिकाका नगरप्रमुख प्रद्युम्न प्रसाद चौहान, उप-प्रमुख तथा पूर्व नगरप्रमुख विशिष्ट अतिथिका रूपमा सहभागी भएका थिए ।
आफ्नो सम्बोधनमा महावाणिज्य दूत देवी सहाय मीना ले सहभागीहरूलाई उत्तम स्वास्थ्य, सद्भाव र समग्र कल्याणका लागि योगलाई दैनिक जीवनमा अपनाउन प्रेरित गर्नु भएको थियो ।
यसै गरी प्रमुख अतिथि माननीय श्याम प्रसाद पटेल र नगरप्रमुख चौहानले विभिन्न स्थानमा योग कार्यक्रम आयोजना गरी योग प्रवर्द्धन गर्ने महावाणिज्य दूतावासको प्रयासको प्रशंसा पनि गरेका थिए ।
