दीपेन्द्र प्रजापति/कालो झोला ।
बीरगंज, ०५ मंसिर । सशस्त्र प्रहरी बल नेपाल प्रस्तावित सीमा सुरक्षा गुल्म, बीरगंज तथा बीरगंज भन्सार कार्यालय को संयुक्त टोलीले बीरगंज महानगरपालिका वडा नं. १०, आदर्शनगर बाट लाखौं मूल्य बराबरको भन्सार छलेर राखेको किराना सामान र औषधि आफ्नो नियन्त्रणमा लिएको छ ।
सशस्त्र प्रहरी बल नेपाल नं. २ छिन्नमस्ता बाहिनी मुख्यालय, बर्दिबास को विशेष सूचनाको आधारमा शुक्रबार उल्लेखित प्रस्तावित सीमा सुरक्षा गुल्म का गुल्मपति सशस्त्र प्रहरी नायब उपरीक्षक पुरुषोत्तम भण्डारीको कमाण्डमा खटिएको टोली र वीरगन्ज भन्सार कार्यालय बाट नायब सुब्बा हफिजुल्ला अन्सारी सहितको संयुक्त टोलीले उल्लेखित वडा कार्यालयको दक्षिणपट्टी रहेको पुरानो घरमा भन्सार छलि चोरी पैठारी गरी भण्डारण गरी राखेको अन्दाजी मूल्य रु. ५४ लाख २८ हजार ६ सय बराबरको किराना समान तथा औषधि बरामद गरी आवश्यक कारवाहीको लागि वीरगन्ज भन्सार कार्यालयमा बुझाइएको छ ।
त्यसै गरी सशस्त्र प्रहरी बल, नेपाल नं. १३ गण हे.क्वा बाट खटिएको टोलीले विभिन्न स्थानमा गरी जम्मा रु. ३ लाख ३९ हजार १ सय ७५ बराबरको किराना सामान, कपडा तथा हार्डवेयरका सामानहरु बरामद गरी भन्सार कार्यालय, विरगंज बुझाएको छ ।साथै सशस्त्र प्रहरी बल नेपाल नं. २ छिन्नमस्ता बाहिनी मुख्यालय, महोत्तरीको विशेष सुचना कै आधारमा सप्रबल नेपाल नं. १२ गण हे.क्वा. बाराले मंसिर ०३ गते बारा जिल्लाको विश्रामपुर गापा-४ बाट अवैध कारोबारको आशंकमा नेपाली रुपैयाँ १० लाख ८० र शुक्रबार बारा जिल्ला कै विश्रामपुर गापा-४ बाट नै अवैध कारोबारको आशंकमा नेपाली रुपैयाँ ६ लाख १५ हजार गरि जम्मा रु. १६ लाख ९५ हजार बरामद गरी बीरगंज भन्सार कार्यालयमा बुझाइएको छ ।
यसै गरी मंसिर ०३ गते सप्रबल नेपाल, प्र.सि.सु.गुल्म वीरगञ्जले बी.म.न.पा. वडा नं.- १६, भन्सार मेनगेटबाट नेपाली रुपैया रु. ३ लाख बरामद गरी भन्सार कार्यालय बुझाईएको थियो । यहि मंसिर ०३ र ०५ गतेको गरी अवैध रकम मात्र जम्मा १९, लाख ९५ हजार बरामद भएको छ ।
सशस्त्र प्रहरी बल नेपाल पर्साले आफ्ना टोली परिचालनलाई चुस्त बनाउँदै अवैध चोरी तस्करी गरी ल्याएका विभिन्न सामानहरु बरामद गर्ने कार्यलाई तिव्रता दिई सीमा क्षेत्रबाट हुने चोरी तस्करी नियन्त्रण गरी राजश्व अभिबृद्धि गर्ने कार्यमा महत्वपुर्ण भुमिका खेल्दै आईरहेको छ ।
सशस्त्र प्रहरी बल नेपालले खुला सीमा ईलाकाको फाईदा उठाउदै हुने अवैध रकम ओसारपसार गर्ने कार्यलाई समेत निरुत्साहन गर्न विशेष कदम चाल्दै आईरहेको छ । सीमा क्षेत्रमा हुने अवैध चोरी तस्करी, लागु औषध ओसारपसार, अवैध रकम ओसार पसार, अवैध हातहतियार ओसारपसार जस्ता सीमा अपराधलाई नियन्त्रण गर्ने कार्यमा सशस्त्र प्रहरी बल नेपाल, नं. २ छिन्नमस्ता बाहिनी मुख्यालय तथा बाहिनी अन्तर्गत रहेको जिल्लामा रहेका सप्रबल नेपालका ईकाईहरुले अहम् भुमिका निभाउदै आईरहेको छ ।
स.प्र.बल, नेपाल नं. १३ गण हे.क्वा.का गणपति पुरन चन्द्र भट्टले सीमावर्ती ईलाकाको प्रयोग गरी हुने अवैध चोरी निकासी तथा पैठारीलाई पूर्ण रुपमा निरुत्साहित गर्न कुनै पनि कसर बाँकी नराख्ने र आगामी दिनमा सीमावर्ती समुदायमा समृद्ध राष्ट्र निर्माणको लागि राजश्वको भुमिका तथा उक्त कार्यमा सीमावर्ती नागरिक, सशस्त्र प्रहरी बल, नेपाल र अन्य सरोकारवाला निकायबीचको सहकार्य विषयमा जनचेतनामुलक कार्यक्रमहरु अभियान कै रुपमा संचालन गरिने समेत बताउनु भएको छ ।
