कोलम्बियामा वायुसेनाको हरक्यूलिस सी-१३० विमान उडान भर्ने क्रममा दुर्घटनाग्रस्त हुँदा ३४ सैनिकको मृत्यु भएको छ भने ७० भन्दा बढी घाइते भएका छन् ।
कोलम्बियाली वायुसेनाका प्रमुखका अनुसार विमानमा ११४ सैनिक र ११ जना चालक दलका सदस्य सवार थिए । दुर्घटना पेरू सीमाना नजिक दक्षिणी अमेजन क्षेत्रको प्यूर्टो लेगुइजामोमा भएको हो। रक्षा मन्त्रालयले विमान रनवेबाट करिब डेढ किलोमिटर टाढा खसेको जनाएको छ ।
घटनाप्रति कोलम्बियाका राष्ट्रपति गुस्तावो पेट्रोले दुःख व्यक्त गर्दै सैनिकहरूको सुरक्षालाई उच्च प्राथमिकता दिनुपर्ने बताएका छन् । उनले यस्तो घटना हुन नहुने भन्दै भविष्यमा यस्ता दुर्घटना रोक्न आवश्यक सुधार गरिने बताएका छन् ।
राष्ट्रपति पेट्रोले सेनालाई आधुनिक उपकरण र स्रोतसाधनले सुसज्जित बनाउने निर्णय पहिले नै भएको तर प्रशासनिक ढिलाइका कारण कार्यान्वयन हुन नसकेको उल्लेख गरेका छन् । उनले आवश्यक काम गर्न नसक्ने अधिकारीलाई हटाइने चेतावनी पनि दिएका छन् ।
सैनिक सुरक्षाका लागि नयाँ हेलिकोप्टर, यातायात विमान र ड्रोनविरुद्धका प्रणाली तत्काल खरिद गर्नुपर्ने उनको भनाइ छ ।
दुर्घटनामा परेको हरक्यूलिस सी–१३० विमान विश्वकै भरपर्दो सैन्य यातायात विमानमध्ये एक मानिन्छ। यसले सैनिक, हतियार र राहत सामग्री ओसारपसार गर्नेदेखि प्राकृतिक विपद्, स्वास्थ्य आपतकाल र अन्य विशेष कार्यमा प्रयोग हुँदै आएको छ।
