काठमाडौँ । नेपाली क्रिकेट टिम लिग-२ को अर्को शृङ्खलाका लागि अमेरिका प्रस्थान गरेको छ । क्यानडाबाट हिजो नेपाली टिम अमेरिका लाग्दा स्पिनर सन्दीप लामिछाने भने नेपाल फर्किएका छन् ।
सन्दीपसँग अमेरिकाको भिसा नभएकाले नेपाल फर्किनुपरेको हो । उनले सामाजिक सञ्जालबाट आफू फर्किँदै गरेको जानकारी गराएका छन् ।
डेढ महिनाअगाडि अमेरिकी दूतावासमा सन्दीपले गरेको भिसा आवेदन अझै पनि होल्डमा छ । टिमका सबै खेलाडीलाई अमेरिकाले तत्काल तीन महिनाको भिसा दिए पनि सन्दीपको आवेदन विचाराधीन राखिएको थियो । उनी पासपोर्ट फिर्ता लिएर क्यानडा उडेका थिए ।
सन्दीप नेपाल फर्किएपछि फेरि अमेरिकी दूतावासमा भिसाको पक्रिया अघि बढाइने नेपाल क्रिकेट संघ (क्यान) स्रोतले बताएको छ । महान्यायाधिवक्ता कार्यालयले सन्दीपको मुद्दामा सर्वोच्चमा पुनरावेदन नगर्ने निर्णय गरिसकेकाले दूतावासले अब तत्काल भिसा दिन सक्ने स्रोतको दाबी छ ।
नेपालले अमेरिका र स्कटल्यान्डसँग लिग २ का ४ खेल खेल्नेछ । यसअघि क्यानडामा तीन खेल हारेको नेपालका लागि यो शृङ्खला निकै महत्त्वपूर्ण छ । अमेरिका र क्यानडा दुवै नेपालका लागि बलिया प्रतिस्पर्धी हुन् । दूतावासले भिसा दिएमा सन्दीप दशैँ मनाइसकेर अमेरिका उड्नेछन् ।
