काठमाडौँ । प्रतिनिधि सभाको आजको बैठकमा उखु किसानको विषय जोडदार रुपमा उठेको छ ।
आजको प्रतिनिधि सभाको बैठकमा राप्रपा सांसद ज्ञानेन्द्र बहादुर शाही, कांग्रेस सांसद एनपी साउद, एकीकृत समाजवादीका सांसद कृष्ण बहादुर श्रेष्ठ, माओवादी केन्द्रका सांसद देवेन्द्र पौडेल र शक्ति बस्नेतलगायतले उखु किसानको माग तत्काल सम्बोधन गर्न सरकारको ध्यानाकर्षण गराएका छन् ।
उनीहरुले सरकारले उखुमा घटाएको आधा अनुदान रकम पुरानै अवस्थामा ल्याउन माग गर्दै पुरानो बाँकी अनुदान भुक्तानी रकम तत्काल भुक्तानको व्यवस्था गर्न माग गरेका छन् ।
उखु बालीमा सरकारले दिँदै आएको अनुदान रकममा कटौती गरेपछि तराई—मधेशका १३ जिल्लाका उखु किसानहरू आन्दोलित भएका छन् । आर्थिक वर्ष २०८१/०८२ को उखु क्रसिङबापतको अनुदान रकम पुरानै दरमा उपलब्ध गराउनुपर्ने माग गर्दै उनीहरूले चरणबद्ध आन्दोलन गरिरहेका छन् ।
नेपाल उखु उत्पादक महासंघका अनुसार, देशभरका १३ जिल्लाका किसानहरूले चिनी उद्योगमा उपलब्ध गराएको उखुको कुल एक अर्ब ६० करोड रुपियाँ अनुदान रकम सरकारले भुक्तानी गर्न बाँकी छ । यसअघि सरकारले उखुको प्रति क्वीन्टल मूल्य ६५५ रुपियाँ तोकेको थियो । जसमा चिनी उद्योगले ५८५ र सरकारले ७० रुपियाँ अनुदान दिने व्यवस्था थियो । तर बजेट अभाव देखाउँदै सरकारले अनुदान रकम आधा घटाएर प्रति क्वीन्टल ३५ रुपियाँमा झारेपछि किसान असन्तुष्ट बनेका हुन् ।
