नेपाली कांग्रेसले मोरङ र सुनसरीका सबै क्षेत्रमा उम्मेदवार टुंगाएको छ । काँग्रेसले मोरङ- १ मा प्रदेश सहमहामन्त्री खड्ग फागोलाई उम्मेदवार बनाएको छ भने
मोरङ- २ मा डा. मिनेन्द्र रिजालले टिकट पाएका छन् । २०७४ मा यसै क्षेत्रबाट विजयी भएका रिजालले २०७९ को चुनावमा टिकट पाएका थिएनन् । त्यस्तै मोरङ- ३ मा सुनिलकुमार शर्मा उम्मेदवार बनेका छन् । उनले अघिल्लो निर्वाचन सोही क्षेत्रबाट जित हासिल गरेका थिए ।
त्यसैगरी मोरङ-४ बाट महामन्त्री गुरूराज घिमिरे उम्मेदवार बनेका छन् । यस क्षेत्रबाट यसअघि लगातार दुई अमनलाल मोदी यस पटक पनि नेकपाबाट उम्मेदवार रहेका छन् । घिमिरे भने पहिलो पटक प्रतिनिधि सभाको उम्मेदवार बनेका छन् । त्यस्तै काँग्रेसले मोरङ-५ बाट फुलकुमार लालबानीलाई उम्मेदवार बनाएको छ ।
त्यसैगरी मोरङ- ६ बाट डा. शेखर कोइराला उम्मेदवार बनेका छन् । कोइराला अघिल्लो निर्वाचनमा पनि सोही क्षेत्रबाट विजयी भएका थिए ।
त्यसैगरी काँग्रेसले सुनसरी-१ बाट क्षेत्रीय सभापति सुजेन्द्र तामाङलाई उम्मेदवार बनाएको छ । उनको प्रतिष्पर्धा श्रम संस्कृति पार्टीका अध्यक्ष हर्क साम्पाङसँग हुने भएको छ । त्यस्तै सुनसरी- २ मा कांग्रेसले राजीव कोइरालालाई उम्मेदवार बनाएको छ ।
त्यस्तै सुनसरी-३ बाट यसअघि विजय गच्छादारलाई टिकट दिइएको बताइए पनि उनको टिकट काटिएको छ र दुहबी नगरपालिकाका प्रमुख वेद गच्छदारलाई टिकट दिइएको छ । त्यस्तै सुनसरी ४ मा ज्ञानेन्द्रबहादुर कार्कीले टिकट पाएका छन् । सो क्षेत्रबाट उनी अघिल्लो निर्वाचनमा विजयी भएका थिए ।
