ललितपुरको खोकनास्थित श्री रुद्रायणी माध्यमिक विद्यालय परिसरमा रोटरी क्लब अफ माउन्ट एभरेष्ट ललितपुरले एकदिने मानसिक स्वास्थ्य सचेतना शिविर सञ्चालन गरेको छ। समाज रूपान्तरणका लागि विभिन्न सामाजिक तथा जनचेतनामूलक कार्यक्रम गर्दै आएको क्लबले यसपटक मानसिक स्वास्थ्यजस्तो संवेदनशील विषयमा समुदायलाई सचेत बनाउने उद्देश्यले शिविर आयोजना गरेको हो।
कार्यक्रमका अध्यक्ष रबी लामिछानेले स्वस्थ समाज निर्माणका लागि मानसिक स्वास्थ्यप्रति जागरूकता अपरिहार्य रहेको बताउँदै यस्ता अभियानलाई आगामी दिनमा पनि निरन्तरता दिइने उल्लेख गरे। शिविरमा सहभागीहरूलाई मानसिक तनाव, भावनात्मक स्वास्थ्य तथा जीवनका चुनौतीहरूको सामना गर्ने उपायबारे जानकारी दिइएको थियो।
कार्यक्रममा डा. एन्जेला रेग्मी र डा. प्रकृति प्रधानले परामर्श तथा काउन्सिलिङ प्रदान गर्दै मानसिक स्वास्थ्य कुनै कमजोरी नभई जीवनको महत्वपूर्ण पक्ष भएको सन्देश दिएका थिए। मानव मनको पीडा बुझ्ने र समयमै सहयोग खोज्ने संस्कार विकास गर्न यस्ता कार्यक्रम प्रभावकारी हुने विश्वास व्यक्त गरिएको थियो।
मानसिक स्वास्थ्यबारे खुला संवाद र सचेतनाले समाजलाई थप सकारात्मक, संवेदनशील र मानवीय बनाउने अपेक्षा गरिएको छ।
