काठमाडौँ । नेपाल राष्ट्र बैंकले विद्युतीय भुक्तानी बारे प्रष्ट पारेको छ । मोबाइल बैंकिङ एप, कनेक्ट आइपिएस र क्युआर कोडमार्फत गरिने कारोबारको सीमाका बारेमा राष्ट्र बैंक प्रष्ट गरेको हो ।
राष्ट्र बैंकले मोबाइल बैंकिङ एप, कनेक्ट आइपिएस र क्युआर कोडमार्फत गरिने कारोबारका लागि दिनको ३ लाखको सीमा तोकेको छ भने महिनामा कति भन्ने सीमा तोकिएको छैन । त्यस्तै वेब एप्लिकेसनको सहायतामा कनेक्ट आइपिएस वा इन्टरनेट बैंकिङमार्फत हुने कारोबारमा दिनको २० लाखको सीमा रहेको छ तर महिनाको सीमा तोकिएको छैन ।
त्यसैगरी बैंक खाताबाट वालेटमा गरिने रकम स्थानान्तरण र वालेटबाट अन्य खातामा गरिने रकम स्थानान्तरणमा दिनको २ लाख र महिनाको १० लाखको सीमा तोकिएको छ भने एक वालेटबाट अर्को वालेटमा रकम स्थानान्तरण गर्न दिनको ५० हजार र महिनाको ५ लाखको सीमा रहेको राष्ट्र बैंकले जनाएको छ ।
साथै राष्ट्र बैंकले नेपाल सरकारलाई भुक्तानी गर्ने कर, राजस्व, जरिवाना, सवारी दस्तुर, रजिस्ट्रेशन तथा सेवा शुल्क, खानेपानी महसुल, विद्युत महसुल, दूरसञ्चार शुल्क, सामाजिक सुरक्षा कोषको रकम भुक्तानी, विद्यालय शुल्क, बीमा प्रिमियम भुक्तानीमा माथि उल्लेखित कुनै पनि सीमा नरहने स्पष्ट गरेको छ ।
