दीपेन्द्र प्रजापति/कालो झोला ।
वीरगञ्ज, ३१ जेठ । नेपाल: भारतीय महावाणिज्य दूतावास, वीरगञ्जले नेपाल-भारत मैत्री संघ (NIFA), पर्सा; नेपाल इनोभेटिभ सोसाइटी, वीरगञ्ज; नेपाल रेडक्रस सोसाइटी, वीरगञ्ज; र नेपाल यंग इन्टरप्रेन्योर्स फोरम, वीरगञ्जको सहकार्यमा विश्व रक्तदाता दिवस २०२६ को अवसरमा आज महावाणिज्य दूतावास परिसरमा रक्तदान शिविरको सफल आयोजना गर्यो ।
यस शिविरमा ठूलो संख्यामा सहभागीहरूले उत्साहपूर्वक भाग लिई स्वेच्छाले रक्तदान गरेर यस पुण्य कार्यमा योगदान पुर्याए । स्थानीय नागरिक, युवा तथा विभिन्न संस्थाका प्रतिनिधिहरूको सक्रिय सहभागिताले कार्यक्रमलाई सार्थक बनाएको थियो ।
यस अवसरमा महावाणिज्य दूत श्री देवी सहाय मीनाले उपस्थित सबै रक्तदाताहरू सँग भेटघाट पनि गर्नुभयो । उहाँले सबैको हौसला बढाउँदै मानवताको सेवाको यस पवित्र कार्यका लागि उहाँहरूलाई बधाई तथा शुभकामना पनि दिनुभयो ।
श्री मीनाले भन्नुभयो, _”रक्तदानले आवश्यक परेका व्यक्तिलाई नयाँ जीवन मात्र दिँदैन, समाजप्रति समर्पित सबै रक्तदाताहरूको यो निस्वार्थ योगदान मानव सेवाको सर्वोत्तम उदाहरण हो ।”यो पहलले सामाजिक संस्थाहरूसँग मिलेर समाज सेवाप्रति भारतीय महावाणिज्य दूतावासको दृढ प्रतिबद्धतालाई दर्शाउँछ ।
भारतीय महावाणिज्य दूतावास, वीरगञ्जले सबै रक्तदाता, सहकार्य गर्ने संस्था र स्वयंसेवकहरूप्रति हार्दिक आभार व्यक्त गर्दछ। दूतावास भविष्यमा पनि विभिन्न संस्थाहरूसँग मिलेर मानवता र समाज कल्याणका लागि काम गर्न संकल्पित छ ।
