काठमाडौँ । विश्वभरका इलेक्ट्रिकल तथा इलेक्ट्रोनिक इन्जिनियरहरूको संस्था आई-ट्रिपल ईको पावर एन्ड इनर्जी सोसाइटी (पीईएस)को आयोजनामा ऊर्जा प्रणाली प्रविधिसम्बन्धी अन्तर्राष्ट्रिय सम्मेलन सोमबारदेखि काठमाडौँमा सुरु भएको छ ।
पीईएसको नेपाल च्याप्टरको सहआयोजनामा भएको यो सम्मेलनमा १५ देशका करिब १०० प्रतिनिधि सहभागी रहेको सम्मेलनको प्राविधिक समितिका कोचेयर डा. सुजन अधिकारीले जानकारी दिए । पावरकन नामले चिनिने यो सम्मेलन ऊर्जा प्रणालीसम्बन्धी विश्वकै ठूलोमध्येको कार्यक्रम मानिन्छ ।
तीन दिनसम्म चल्ने सम्मेलनमा ऊर्जा प्रणालीसम्बन्धी ७७ वटा पेपरहरु प्रस्तुत हुने आयोजकले जनाएको छ ।
कार्यक्रममा सम्बोधन गर्दै आई ट्रिपल ई-पावर एन्ड इनर्जी सोसाइटीकी पूर्वअध्यक्ष जेसिका बियानले यो सम्मेलनले ऊर्जा क्षेत्रमा अहिले भइरहेका र भोलि हुने परिवर्तनले भविष्यको पुस्तालाई कसरी लाभान्वित बनाउन सकिन्छ भन्ने विषयलाई दिशा निर्देश गर्ने बताइन् । यो संसारभरिका इलेक्ट्रिकल इन्जिनियरहरूलाई जोड्ने महत्त्वपूर्ण कार्यक्रम भएको उनले बताइन् ।
अष्ट्रेलियन इनर्जी मार्केट अपरेटरका रणनीतिक सल्लाहकार डिन सर्राफीले अहिलेको विश्व ऊर्जा संक्रमणको चौबाटोमा रहेको बताए ।
यस्ता परिवर्तनबारे जान्न र भोलिको भविष्यमा के गर्ने भन्नेबारे छलफल गर्न यो सम्मेलन महत्त्वपूर्ण हुने उनले बताए ।
आईट्रिपलई-पीईएसका भाइस प्रेसिडेन्ट निर्मल नायरले ऊर्जा क्षेत्रका चुनौतीपूर्ण विषयहरूमा विद्यार्थीहरूलाई पारंगत बनाउन आईट्रिपले इन्जिनियरहरूलाई छात्रवृत्ति दिइरहेको जानकारी दिए ।
ऊर्जा मन्त्रालयका पूर्वसचिव दिनेशकुमार घिमिरेले विश्वासिलो र गुणस्तरीय ऊर्जा अहिलेको आवश्यकता रहेको बताए ।
कार्यक्रममा आईट्रिपलईको पावर एन्ड इनर्जी सोसाइटी (पीईएस) नेपाल च्याप्टरका अध्यक्ष प्रा. नवराज कार्कीले यति महत्त्वपूर्ण सम्मेलन काठमाडौँमा गर्न पाउनु नेपालका लागि गौरवको कुरा रहेको बताए ।
चाइनिज सोसाइटी अफ इलेक्ट्रिकल इन्जिनियरिङ र आई ट्रिपल ई पावर एन्ड इनर्जी सोसाइटीको पहलमा सन् १९९८ देखि भइरहेको सम्मेलन मूलतः एसिया प्यासिफिक मुलुकहरूमा आयोजना हुने गरेको छ । अहिले काठमाडौँमा यसको १६औँ संस्करण भइरहेको हो ।
