दीपेन्द्र प्रजापति/कालो झोला ।
वीरगंज, ०२ बैशाख । हनुमान जन्मोत्सवको झाँकीमाथि भएको ढुंगामुढापछि उत्पन्न तनाव अझ चुलिँदै जाँदा, त्यस घटनाको समाचार संकलनका लागि पुगेका पत्रकारमाथि प्रहरीले निर्घात लाठी प्रहार गरी पत्रकारिता क्षेत्रमाथि खुला हमला गरेको छ ।
स्थानीय प्रशासनले सोमबार केही हिन्दुवादी युवाहरुलाई नियन्त्रणमा लिएपछि जिल्ला प्रहरी कार्यालय, पर्सामा तनाव सृजना भएको थियो । त्यही विषयमा रिपोर्टिङका लागि पुगेका पत्रकारहरूमाथि मंगलबार प्रहरीले अकल्पनीय दमन गर्यो । चन्द्रसूर्य वाणी दैनिकका सम्पादक धिरेन्द्र तिवारी, एभिन्युज टेलिभिजनका पत्रकार अर्जुन गुप्ता लगायत केही सर्वसाधारण प्रहरीको निर्मम लाठी चार्जबाट घाइते भएका छन् ।
सत्य तथ्य उजागर गर्न, जनतासामु साँचो सूचना पु-याउन अग्रपंक्तिमा खटिने पत्रकारहरूमाथि भएको यो दमनले प्रेस स्वतन्त्रता र अभिव्यक्तिको अधिकारमाथि खुला प्रहार भएको छ। यस घटनाले नेपाल प्रहरीको असहिष्णु, निरंकुश र प्रेसविरोधी चरित्र फेरि एकपटक उजागर गरिदिएको छ ।“प्रेस स्वतन्त्रता कुण्ठित पार्ने जुनसुकै गतिविधि र दमनप्रति हाम्रो गम्भीर आपत्ति छ। लोकतान्त्रिक मुल्यमान्यतालाई कुल्चिने प्रहरीका यस्ता कदमहरू क्षम्य हुन सक्दैनन्,” घटनास्थलमा रहेका पत्रकारहरूले आक्रोश पोखेका छन् ।
दुई दिन अघि हनुमान जन्मोत्सवको झाँकीमा भएको ढुंगामुढापछि वीरगंज तनावग्रस्त बनेको थियो। स्थिति नियन्त्रणमा लिन प्रशासनले कर्फ्यू समेत लगाएको थियो। तर शान्ति सुरक्षाको नाममा निर्दोष युवाहरुको गिरफ्तारी र पत्रकारहरूमाथिको लाठीचार्जले प्रशासनको चरित्रप्रति नै गम्भीर प्रश्न उठाएको छ ।यो घटनाको निष्पक्ष छानबिन गरी दोषी प्रहरीमाथि कारबाही हुनुपर्ने आवाज सामाजिक सञ्जालदेखि मानवअधिकारकर्मी र पत्रकार संगठनहरूसम्म फैलिएको छ ।
